ހައުސިން ޑިވެލޮޕްމަންޓް ކޯޕަރޭޝަން, އެޗްޑީސީ ރިބްރޭންޑްކޮށް، އެ ކުންފުންޏަށް ކިޔަން ފެށި "އާބަންކޯ" ގެ ނަން ބޭނުންކުރުން ހުއްޓާލައި އަނެއްކާވެސް އެޗްޑީސީ ކިޔަން ނިންމައިފިއެވެ. އެޗްޑީސީގެ ބްރޭންޑު އާބަންކޯއަށް ބަދަލުކުރީ އެ ކުންފުނީގެ 22 ވަނަ އަހަރީ ދުވަހު، 1 އޭޕްރީލް 2023 ގައެވެ.

އެޗްޑީސީން ނެރުނު ބަޔާނެއްގައި ބުނީ ކުންފުނީގެ ބްރޭންޑް 'އާބަންކޯ'އަށް ބަދަލުކުރަން ނިންމީ، ރައްޔިތުންނަށް ފޯރުކޮށްދެމުން އަންނަ ހިދުމަތްތައް އިތުރަށް ފުރިހަމަކޮށް ރާއްޖޭގެ އެންމެ ބޮޑު އާބަން ޑިވެލޮޕްމަންޓް ކުންފުނީގެ ގޮތުގައި މަސައްކަތްތައް ބައްޓަން ކުރަން ކަމަށެވެ.

މިދިޔަ ހަފްތާގެ ހޮނިހިރު ދުވަހު ރައީސް ޑރ. މުހައްމަދު މުއިއްޒު ހުޅުމާލޭގައި ބޭއްވެވި ކެމްޕެއިން ބައްދަލުވުމެއްގައި ވިދާޅުވީ އެޗްޑީސީގެ ނަން އާބަންކޯ އަށް ބަދަލުކޮށްފައި އޮތީ ނަމެއްގައިކަމަށެވެ. 

ހުޅުމާލޭގައި ހުންނަ އެޗްޑީސީގެ އިމާރާތުގެ ލޯގޯ ވެސް އާބަންކޯ އާ ގުޅޭ ގޮތަށް އެއިރު ބަދަލުކުރިއެވެ. އަދި ކުންފުނީގެ މުވައްޒަފުންގެ ރަސްމީ ހެދުމުގައި ވެސް ބޭނުންކުރަމުން އައީ އާބަންކޯގެ ލޯގޯއެވެ.