މިއަހަރު ބާއްވާ، ރައްޔިތުންގެ މަޖިލީހުގެ އިންތިޚާބު 2024 ގައި ވޯޓުލުމުގެ ހައްޤު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމަށް ދީފައިވާ މުއްދަތު އަންނަ އާދިއްތަ ދުވަހަށް ހަމަވާނެ ކަމުގައި އިލެކްޝަންސް ކޮމިޝަނުން ބުނެފިއެވެ.

އެކޮމިޝަނުން ބުނީ، ވޯޓާސް ރެޖިސްޓްރީއަށް ޝަކުވާ ހުށައެޅުމުގެ އެންމެ ފަހު، ތާރީޚަކީ، 2024 ޖެނުއަރީ 21 ވާ އާދީއްތަ ދުވަސް ކަމަށެވެ. 

އިލެކްޝަންސް ކޮމިޝަންގެ ނައިބު ރައީސް އިސްމާއީލް ޙަބީބު ވިދާޅުވީ، ވޯޓާސް ރެޖިސްޓްރީގައި، އެމީހެއްގެ ނަން، އެޑްރެސް ، އައިޑެންޓިޓީ ކާޑު ނަންބަރު އަދި ޚާއްޞަކޮށް އެމީހަކު ވޯޓުލާންޖެހޭ ދާއިރާ އޮތީ ރަނގަޅަށްތޯ ބެއްލެވުމަކީ ވަރަށްބޮޑަށް އެދިވަޑައިގަންނަވާ ކަމެެއް ކަމަށެވެ.

އަދި މިހާރު ކޮމިޝަނުން ދީފައިވާ، މުއްދަތު ގައި ޗެކް ނުކުރެވިއްޖެނަމަ، ބޭނުންވާ ދާއިރާއަށް ވޯޓު ލުމުގެ ފުރުޞަތުގެއްލިދާނެ ކަމަށާއި، އިލެކްޝަންސް ކޮމިޝަނުން، ވޯޓުލުމުގެ ހައްޤު ލިބިފައިވާ މީހުންގެ ލިސްޓް އެކުލަވާލުމުގައި، މަސްދަރެއްގެ ގޮތުން ބަލާނީ ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން ގައިވާ އައިޑެންޓިޓީ ކާޑު ގެ މަޢުލޫމާތަށް ކަމުގައިވެސް ޙަބީބު ވިދާޅުވިއެވެ.

ޤާނޫނުގައި ވާގޮތުން ވޯޓުލުމުގެ ހައްޤު ލިބިފައިވާ މީހުންގެ ލިސްޓް އާއްމުކޮށް ޝަކުވާ ހުށައެޅުމަށް ދޭންޖެހެނީ 10 ދުވަހުގެ މުއްދަތެކެވެ. އައިޑެންޓިޓީ ކާޑު ގައިވާ މައުލޫމާތާއި، ވޯޓުލުމުގެ ހައްޤު ލިބިފައިވާ މީހުންގެ ލިސްޓުގައިވާ މައުލޫމާތު ދިމާވޭތޯ 1414 އާ ގުޅުއްވައިގެންނާއި، އެސްއެމްއެސްކޮށްގެން ޗެކްކުރެވޭނެއެވެ.