ފްލައިޓް ލޭންޑް ކުރުން ޑިލޭވާނެކަން، އިއުލާނު ކުރުމުން ފްލައިޓްގެ ފަސިންޖަރެއްގެ ގޮތުގައި ހުރި އިންޑިއާ މީހަކު ޕައިލެޓަށް ހަމަލާދީފިއެވެ.

މިހާދިސާ ހިނގާފައި ވަނީ އިންޑިއާގެ އެއާލައިނެއްކަމަށްވާ، އިންޑިއގޯގެ ފްލައިޓެއް ވައިގެ ތެރޭގައި އޮއްވައެވެ. އެވީޑިއޯ ސޯޝަލް މީޑިއާގައި މިހާރު ދަނީ ދައުރުވަމުންނެވެ.

ވީޑިއޯއިން ފެންނަ ގޮތުގައި އިންޑިގޯގެ ފްލައިޓް ލޭންޑުކުރުން ކޮންމެވެސް ސަބަބަކާއި ހުރެ ޑިލޭވެއްޖެކަން އިޢުލާނުކުރަނީ، ކޮކްޕިޓުން ނުކުމެ ކޯ ޕައިލެޓެވެ. އެވަގުތު އިންޑިއާގެ ޒުވާން ފިރިހެނަކު ވަނީ، ފުންމައިގެން ގޮސް ޕައިލެޓްގެ މޫނު މަތީގައި ޖަހާފައެވެ. އަދި ހިންދީ ބަހުން، ފްލައިޓް ދުއްވަންޏާ ދުއްވާށޭ، ނުދުއްވަންޏާ ނުދުއްވާށޭ ބުނެއެވެ. 

އަަދި ޕައިލެޓްގައި ޖެހުމުން ފްލައިޓްގައި ދެންތިބި މީހުން އޭނާ ދުރުކޮށްގެން ޝީޓަށް ގެންދިޔުމުން، ގޮނޑީގައި އިނދެ އިނދެ މޮޔަވާވަރުވެއްޖެއޭ ހިންދީބަހުން އޭނާ ބުނާ އަޑުއިވެއެވެ.

ދައުރުވަމުންދާ ވީޑިއޯ، ސޯޝަލްމީޑިއާއަށް ދޫކޮށްލާފައިވަނީ، ގަލްފް ނިއުސްއަށް ކޮލަމް ލިޔުއްވާ އިންޑިއާގެ ޕްރޮފެސަރެއް ކަމުގައިވާ، އަޝޯކް ސްވައިންއެވެ. އޭނާއަކީ މޯދީގެ ސަރުކާރަށް ވަރަށް ބޮޑަށް ފާޑުވިދާޅުވާ ބޭފުޅެކެވެ. އޭނާ އާއްމުކުރެއްވި ވީޑިއޯގައި ހާދިސާ އާއި ގުޅޭ އިތުރު މައުލޫމާތެއް ހިމަނުއްވާފައެއް ނުވެއެވެ.

އިންޑިއާގެ އެއާލައިންތަކުގެ މަތިންދާ ބޯޓުތަކުގެ ތެރޭގައި ފަސިންޖަރުން މާރާމާރީ ހިންގުމަކީ އާއްމު ކަމަކަށްވެފައި އޮންނަކަމެވެ.

ބައިނަލްއަޤުވާނީ ވައިގެ ދަތުރުފަތުރާއި ބެހޭ ޤާނޫނުތަކުގައި ވާގޮތުންނައި، ޤައުމުތަކުން އަމަލުކުރާ އެޤައުމުތަކުގެ ޤާނޫނު ތަކުގައިވެސް، ފްލައިޓުގެ ކުރޫންނަށް އެއްވެސް ބާވަތެއްގެ ގޯނާއެއް ކުރުމާއި މާރާމާރީ ހިންގުމާއި، ނުވަތަ ބިރު ދެއްކުމަކީ، ޖަލު ހުކުމްތައް ކަނޑައެޅިފައި އޮންނަ ބޮޑެތިކުށްކުށެވެ.