މިއަދު ހުޅުވިގެން ދިޔަ އައު ކާގޯ ޓާމިނަލާއިއެކު އަހަރަކު 120000 ޓަނުގެ މުދާ އެމްއޭސީއެލްއަށް ހޭންޑްލް ކުރެވޭނެ ކަމުގައި އެކުންފުނީގެ މެނޭޖިންގ ޑައިރެކްޓަރ އިބްރާހިމް ޝަރީފް މުހައްމަދު ވިދާޅުވެއްޖެއެވެ.

ޝަރީފް މިހެން ވިދާޅުވީ، އެމްއޭސީއެލްގެ އައު ކާގޯޓާމިނަލް ހުޅުވުމަށް މިއަދު ހަވީރު ވެލާނާ އިންޓަރނޭޝަނަލް އެއާޕޯޓުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

ޝަރީފް ވިދާޅުވީ، ކުރިން ކާގޯޓާމިނަލްގެ ގޮތުގައި ބޭނުން ކުރި އިމާރާތަކީ 40 އަހަރުވެފައިވާ ތަނެއް ކަމަށާއި، އެތަނުގައި އަހަރެއްގެ މައްޗަށް ހޭންޑްލް ކުރެވެނީ 50000 ޓަނު ނަމަވެސް، އޯވަރ ކެޕޭސިޓީގައި 75000 ޓަނުގެ މުދާވެސް ހޭންޑްލްކުރެވިފައިވާ ކަމަށެވެ.

Advertisement

ޝަރީފް ވިދާޅުވީ، 2018 ވަނަ އަހަރު އައު ކާގޯ ޓާރމިނަލްގެ ބިންގާ އެޅި މަސައްކަތް ފަށައި 2022 ވަނަ އަހަރު އިމާރާތް ނިމުނު ނަމަވެސް އެތަން ހުރީ ބޭނުން ނުކުރެވި ކަމަށެވެ. އަދި މިޖެނުއަރީ މަހުގައި އައު ޓާމިނަލްއާ ހަވާލުވުމަށް ފަހުގައިވެސް ބޭނުން ނުކުރެވި ދުވަސްތަކެއް ދިޔަ ކަމަށެވެ. އެގޮތުން އެފަދަ ބޮޑު ފެސިލިޓީއެއް ބޭނުން ނުކުރެވި ހޭދަވާ ކޮންމެ ދުވަހަކީވެސް އިސްރާފްވާ ފައިސާ ކަމުގައި އޭނާ ވަނީ ފާހަގަކުރައްވާފައެެވެ.

ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ ތެރޭގައި ހިމެނިގެން ތަރައްޤީކޮށްފައިވާ މި އައު ކާގޯ ޓަރމިނަލަކީ ކުރީގެ ޓަރމިނަލަށްވުރެ ކާގޯ ހޭންޑްލިންގގެ މަސައްކަތް ގާތްގަނޑަކަށް ތިންގުނަ އިތުރަށް ކުރެވޭ ވަރުގެ ޓަރމިނަލެކެވެ. އެގޮތުން ކުރީގެ ބާ ޓަރމިނަލުން އަހަރަކު 50،000 ޓަނުގެ ކާގޯގެ ޚިދުމަތްދެވޭ އިރު މި އައު ކާގޯ ޓަރމިނަލާއެކު ޖުމްލަ 120،000 ޓަނުގެ ކާގޯގެ ޚިދުމަތް އަހަރަކު ދެވޭނެ ގާބިލުކަން ހުންނާނެއެވެ.