ރާއްޖޭގެ ސިއްޙީ ޚިދުމަތަށް އިންޤިލާބީ ބަދަލާއި ކުރިއެރުން ގެނައުމަށްޓަކައި ރައީސް ޔާމީނުގެ ސަރުކާރުގައި އިމާރާތް ކުރެވުނު 25 ބުރީގެ ދަރުމަވަންތަ ހޮސްޕިޓަލް ވާންޖެހޭނީ ސަރުކާރުގެ މައި ހޮސްޕިޓަލަށް ކަމުގައި، ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ހަލީމް ވިދާޅުވެއްޖެއެެވެ.

ދަރުމަވަންތަ ހޮސްޕިޓަލްގެ ޚިދުމަތްތައް ފުޅާކުރެއްވުމާއި ގުޅޭ ގޮތުން، "ނޫން.އެމްވީ" ވާހަކަފުޅު ދައްކަވަމުން ހަލީމް ވިދާޅުވީ، ދަރުމަވަންތަ ހޮސްޕިޓަލަކީ ދިވެހިންގެ ފަޚުރާއި ޝަރަފާއި ގުޅިފައިވާ ރާއްޖޭގެ ސިއްޙީ ޚިދުމަތުގެ މުހިއްމު ރަމްޒެއް ކަމަށެވެ. އެހެންކަމުން ސަރުކާރުގެ މައި ހޮސްޕިޓަަލަކަށް ވާންޖެހޭނީ، ދަރުމަވަންތަ ހޮސްޕިޓަލްކަމުގައި ދެކެވެވަޑައިގަންނަވާ ކަމަށާއި، އަދި އެގޮތަށް މުޚާތަބުކުރުމަކީވެސް އެދިވަޑައިގަންނަވާ ކަމެއްގެ ގޮތުގައެވެ.

މީގެ އިތުރުން ހަލީމް ވިދާޅުވީ، ސިއްޚީ ޚިދުމަތް އިތުރަށް ފުޅާކުރުމުގައިވެސް އިސްކަންދެވޭނީ ދަރުމަވަންތަ ހޮސްޕިޓަލަށް ކަމަށާއި، ދެން އަޅާ އިމާރާތްތައްވެސް ވާނީ އެހޮސްޕިޓަލްގެ އެކްސްޓެންޝަން ޢިމާރާތްތަކަށް ކަމަށެވެ.

ރައީސް ޢަބުދުﷲ ޔާމީން ޢަބުދުލްޤައްޔޫމުގެ ސަރުކާރުގައި ދަރުމަވަންތަ ހޮސްޕިޓަލް ޢިމާރާތް ކުރަންފެށީވެސް މުޅިން ވަކި ހޮސްޕިޓަލެއްގެ ގޮތުގައެވެ. އަދި އެހޮސްޕިޓަލުގައި، އެހާތަނަށް ސަރުކާރުގެ މައި ހޮސްޕިޓަަލުގެ ގޮތުގައި ހިންގަމުން އައި އިންދިރާގާނދީ މެމޯރިއަލް ހޮސްޕިޓަލްގައި ދެވެންނެތް ޚިދުމަތްތައް ދެވޭނެ ގޮތަށް ފަރުމާކުރައްވައި، ޒަމާނީ ބަދަލުތައް ދަރުމަވަންތަ ހޮސްޕިޓަލުގައި ހިމެނުންވިއެވެ.

ދަރުމަވަންތަ ހޮސްޕިޓަލްގެ 25 ބުރީގެ އިމާރާތަކީ، މާލޭގެ މަލަމަތިން އެންމެ ދުރަށް ފެންނަ ހުންނަ އެންމެ އުސްބިނާއެވެ. އަދި އެ އިމާރާތަކީ، މާލޭގެ އެންމެ މުހިއްމު ލޭންޑްމާކަށްވެސް ވަނީ ވެފައެވެ.

އިންޑިއާ ސަރުކާރުގެ އެހީގައި ބިނާކޮށް 1996 ވަނަ އަހަރު ހުޅުވުނު އިންދިރާގާނދީ މެމޯރިއަލް ހޮސްޕިޓަލުގެ އިމާރާތް ވަރަށް ބޮޑަށް ބާވެ ވަނީ ޖާގަ ދަތިވެފައެވެ. އަދި އެހޮސްޕިޓަލަށް އިތުރު ކުރެވުނު 11 ބުރީގެ އައު އިމާރާތް ބިނާކޮށް ނިންމުމަށްވެސް 8 އަހަރު ހޭދަވެގެންދިޔައެވެ.