ރާއްޖޭގައި ތިބި އިންޑިއާ ސިފައިން ބޭލުމާއި ގުޅޭ ގޮތުން ދެޤައުމުގެ އިސްބޭފުޅުން ހިމެނޭ ގޮތުން އެކުލަވާލާފައިވާ، މަތީފެންވަރުގެ ކޮމިޓީގެ ދެވަނަ ބައްދަލުވުން އޮންނާނީ އިންޑިއާގައި ކަމުގައި އިންޑިއާގެ އެކްސްޓަރނަލް އެފެއާޒް މިނިސްޓްރީން ބުނެފިއެވެ.

ދެޤައުމުގެ އިސް ބޭފުޅުން ހިމަނައިގެ އެކުލަވާލާފައިވާ މަތީފެންވަރުގެ ކޮމިޓީގެ ފުރަތަމަ ބައްދަލުވުން އިއްޔެ ބާއްވާފައި ވަނީ، ރާއްޖޭގެ ފޮރިން މިނިސްޓްރީގައެވެ. މި މަޝްވަރާތަކުގެ ދެވަނަ ބައްދަލުވުން ބާއްވާނީ އިންޑިއާގައި އިންޑިއާގެ އެކްސްޓަރނަލް އެފެއާޒް މިނިސްޓްރީން ނެރުނު ބަޔާނުގައި ފާހަގަކޮށްފައި ވީ ނަމަވެސް، ފުރަތަމަ ބައްދަލުވުމަށްފަހުގައި ރާއްޖޭގެ ފޮރިން މިނިސްޓްރީން ނެރުނު ބަޔާނުގައި އެވާހަކަ ހިމަނާފައެއް ނުވެއެވެ.

މީގެ އިތުރުން އިންޑިއާގެ އެކްސްޓަރނަލް އެފެއާޒް މިނިސްޓްރީން ނެރުނު ނޫސްބަޔާނުގައި، ރާއްޖެއަށް އިންޑިއާއިން ހަދިޔާކޮށް އިންޑިއާ ސިފައިން ތިބެގެން ދުއްވަމުންދާ، ޑޯނިއަރ ފްލައިޓާއި ދެ ހެލިކޮޕްޓަރުގެ އޮޕަރޭޝަންސްތައް ނުހުއްޓޭނެ ގޮތަކަށް ކަންކަން ހަމަޖެއްސުމަށް މަސައްކަތް ކުރަމުންދާކަން ހާމަކޮށްފައިވެއެވެ. އެހެން ނަމަވެސް ދެޤައުމުގެ މެދުގައި ހުރި މައްސަލަތައް ހައްލުކުރުމާއި ގުޅޭ ގޮތުން މަޝްވަރާކުރެވުނު ކަން ފިޔަވައި ރާއްޖޭގެ ފޮރިން މިނިސްޓްރީ އިތުރުކަމެއް ފާހަގަކޮށްފައެއް ނުވެއެވެ.

މީގެ އިތުރުން ދިވެހި ސަރުކާރުން އިންޑިއާއަށް ހުށައަޅާފައި ވަނީ މާރިޗު މަހުގެ 15ގެ ކުރިން ރާއްޖޭގައި ތިބި އިންޑިއާ ސިފައިން ބޭލުމަށް ކަމަށް ވުމާއިއެކު އިންޑިއާ ސިފައިން ރާއްޖެއިން ބޭލުމުގެ ކަންކަން އަވަސްކުރުމަށް އިންޑިއާއިން ވަނީ އެބަސްވެފައި ކަމުގައި ރާއްޖޭގެ ފޮރިން މިނިސްްޓްރީ ފާހަގަކޮށްފައެވެ.

ރާއްޖެއަށް އިންޑިއާއިން ދެ ހެލިކޮޕްޓަރާއި، ޑޯނިއާ މަތިންދާބޯޓެއް ހަދިޔާކޮށްފައި ވާއިރު، އެއުޅަނދުތައް ދުއްވަން ތިބެނީ އިންޑިއާގެ ވައިގެ އަސްކަރިއްޔާގައި ހިމެނޭ އިންޑިއާގެ ސިފައިންނެވެ. އަދި ރާއްޖޭގައި ތިބޭ އެސިފައިންގެ ޚަރަދުތައް ބަލަހައްޓަނީ ދިވެހި ސަރުކާރުންކަންވެސް އެނގިފައިވެއެވެ.