އެމްޑީޕީގެ ޓިކެޓްގައި 20 ވަނަ ރައްޔިތުންގެ މަޖިލީހަށް މެމްބަރުން ހޮވުމަށް ބާއްވާ އިންތިޚާބުގައި ވާދަކުރައްވާނެ ކެންޑިޑޭޓުން ކަނޑައެޅުމަށްޓަކައި ބާއްވާ ޕްރައިމަރީ، އަންނަ ފެބުރުއަރީ މަހުގެ 3 ވަނަ ދުވަހު ބޭއްވުމަށް ނިންމާފައިވާ ކަމުގައި އެމްޑީޕީން ބުނެފިއެވެ.

އެމްޑީޕީން ބުނީ، 20 ވަނަ ރައްޔިތުންގެ މަޖިލީހަށް ވާދަކުރެއްވުމަށް ޝައުޤުވެރިކަން ފާޅުކުރި ފަރާތްތަކުގެ ތެރެއިން، އެއްދާއިރާއަކަށް އެއްބޭފުޅަކަށްވުރެ ގިނަ ބޭފުޅުން ޝައުޤުވެރިކަން ފާޅުކޮށްފައިވާ ދާއިރާތަކުގައި، ޕާޓީގެ ޓިކެޓް ދިނުމަށް ހަމަޖައްސާފައި ވަނީ ޕްރައިމަރީއެއް ބާއްވައިގެން ކަމަށެވެ. މިގޮތުން ޕްރައިމަރީ ބާއްވާ ދާއިރާތަކާއި އެދާއިރާތަކުގެ ކެންޑިޑޭޓުންގެ ނަމާއި ކެންޑިޑޭޓް ނަމްބަރުތައް މިހާރު އާއްމުކޮށް އިޢުލާނުކޮށްފައިވާ ކަމަށްވެސް އެމްޑީޕީން ވަނީ ބުނެފައެވެ.

މިގޮތުން އެމްޑީޕީގެ ޕްރައިމަރީގައި 43 ދާއިރާއަކުން، 112 ބޭފުޅުން ވާދަކުރައްވައެވެ. އަދި 35 ދާއިރާއަކަށް ޝައުޤުވެރިކަން ފާޅުކުރައްވާފައި ވަނީ އެންމެ ބޭފުޅަކަށްވާތީ، އެދާއިރާތަކުގައި ޕްރައިމަރީއެއް ނުބާއްވައި އެބޭފުޅުންނަށް ޕާޓީގެ ޓިކެޓް ދިނުމަށްވެސް އެމްޑީޕީން ވަނީ ނިންމާފައެވެ.