ސޯމާލިއާގެ އައްސޭރި ފަށުގައި އޮތް އެމެރިކާގެ ކަނޑުގެ ސިފައިންގެ މަނަވަރަކުން ސިފައިންގެ ދެމީހުން ކަނޑަށްވެއްޓި ގެއްލިފައިވާ ކަމުގައި އެމެރިކާއިން ބުނެފިއެވެ.

މިހާދިސާ ހިނގާފައި ވަނީ ބުރާސްފަތި ދުވަހުގެ ރޭގައެވެ.

އެމެރިކާއިން ބުނީ ކަނޑަށް ވެއްޓުނު ސިފައިންގެ ދެމީހުންގެ މަސައްކަތް ހޯދުމުގެ މަސައްކަތް ކުރަމުންދާ ކަމަށާއި އެހެން ނަމަވެސް އެދެ މީހުން ފެނިފައި ނުވާކަމަށެވެ. އެމެރިކާގެ ކަނޑުގެ ސިފައިން ރޭގަނޑުގެ މިޝަން އެއްގައި ހަރަކާތްތެރިވި އެ ދެސިފައިންގެ މީހުން ގެއްލުނީ މަނަވަރަށް އަރަށް އުޅުމުގެ ތެރޭގައި ރާޅު ބޮޑުވެ، އެކަކު ކަނޑަށް ވެއްޓުމުން އޭނާއާއެކު ހުރި ދެވަނަ މީހާ އޭނާ ސަލާމަތްކުރުމަށް ފަހަތުން ކަނޑަށް ފުންމާލުމުންނެވެެ.

އެމެރިކާގެ ސެންޓްރަލް ކޮމާންޑުން ހޮނިހިރު ދުވަހު ނެރުނު ބަޔާނެއްގައި ބުނީ ބުރާސްފަތި ދުވަހުގެ ރޭ ހިނގި ހާދިސާއާ ގުޅޭ އިތުރު މައުލޫމާތު ހާމަކުރާނީ އެމީހުން ހޯދުމަށް ހިންގާ އޮޕަރޭޝަން ނިމުމުން ކަމަށެވެ.

ގަލްފް އޮފް އަދަނުގައި ހިނގި ކަމަށް ބުނާ މިހާދިސާ އާއި ގުޅޭ ގޮތުން ހޫތީން ވަނީ ސުވާލު އުފައްދާފައެވެ.

ރަތްކަނޑު ހުރަސްކޮށް އިޒްރޭލަށް މުދާ އުފުލާ އުޅަނދުތަކަށް ޔަމަނުގެ ހޫތީން ހަމަލާދޭތީ، އިޒްރޭލުގެ ބޯޓު ފަހަރަށް ހިމާޔަތް ދިނުމަށް އެމެރިކާގެ މަނަވަރުތައް ގަލްފް އޮފް އަދަނަށް ވަނުމަށް ފަހު، އެމެރިކާ އާއި އިނގިރޭސީން ގުޅިގެން ވަނީ ޔަމަނަށް ވައިގެ މަގުން ހަމަލާދޭން ފަށާފައެވެ. މިގޮތުން ބުރާސްފަތި ދުވަހުގެ ރެއާއި ހުކުރު ދުވަހުގެ ރޭ އެމެރިކާއިން ވަނީ، ހޫތީން 30 ވުރެ ގިނަ އަމާޒުތަކަށް ބޮން އަޅާފައެވެ.