އައްޑޫ ސިޓީ ފޭދޫ ގައި މިރޭ 19:15 ހާއިރު ސައިކަލަކާއި ކާރެއް ޖެހި ހިނގި އެކްސިޑެންޓަކާއި ގުޅިގެން ސޯޝަލް މީޑިއާގައި ފަތުރަމންދާ ބައެއް ވާހަކަތައް ފުލުހުން ދޮގުކޮށްފިއެވެ.

މިއެކްސިޑެންޓް ހިނގީ ދެ އަންހެނަކު ތިބި ސައިކަލަކާއި، ކާރެއް ޖެހިގެންނެވެ. ސޯޝަލް މީޑިއާގައި ބައެއް މީހުން ތުހުމަތުކޮށްފައިވާ ގޮތުގައި، އެކާރަކީ ރަޖިސްޓްރީކޮށްފައި ނުވާ ކާރެކެވެ. އަދި އެކްސިޑެންޓްވުމުން ސީން ރޫޅާލިކަމަށްވެސް ތުހުމަތުކޮށްފައިވެއެވެ. އެހެންނަމަވެސް އެކަން ދޮގުކޮށް މިރޭ ފުލުހުންގެ އިދާރާއިން ނެރުނު ބަޔާނުގައި ބުނެފައިވަނީ، ސީން ރޫޅާލާފައި ވަނީ އެ އެކްސިޑެންޓް ހިނގުމުން ހަމަޖެހިފައިވާ އުސޫލުތަކާއި އެއްގޮތަށް ސީން ޕްރޮސެސްކޮށްފައި ކަމަށާއި، އަދި އެކްސިޑެންޓްވި ކާރާ ސައިކަލަކީވެސް ރަޖިސްޓްރީކޮށްފައިވާ އުޅަނދުތަކެއް ކަމަށެވެ. އަދި އެއުޅަނދުތައް ދުއްވި މީހުންގެ އަތުގައި އިންޖީނުލީ އެއްގަމު އުޅަނދުފަހަަރު ދުއްވުމުގެ ލައިސަންސް އޮންނަ ކަމުގައިވެސް ފުލުހުންގެ އިދާރާއިން ވަނީ ބުނެފައެވެ.

ފުލުހުންގެ އިދާރާއިން ބުނީ، އެ އެކްސިޑެންޓްގައި އަނިޔާވެފައި ވަނީ އުމުރުން 37 އަހަރުގެ އަންހެނަކަށާއި އުމުރުން 18 އަހަރުގެ އަންހެނަކަަށް ކަމަށެވެ. އަދި އެކްސިޑެންޓްގައި ލިބުނު ޒަޚަމްތަކަށް އައްޑޫ އިކުއެޓޯރިއަލް ހޮސްޕިޓަލްގައި ފަރުވާދެމުންދާ ކަމަށާއި އެދެ މީހުންގެ ހާލުވެސް ރަނގަޅު ކަމަށް، ހޮސްޕިޓަލުން މައުލޫމާތު ދީފައިވާ ކަމަށް ފުލުހުން ވަނީ ބުނެފައެވެ.