މިދިޔަ ހުކުރު ދުވަހު މާލެއަށް ބޯކޮށް ވާރޭވެހި ފެންބޮޑުވުމުގެ ސަބަބުން ލިބުނު ގެއްލުން 1.1 މިލިއަނަށް ވުރެ ބޮޑުކަމުގައި ޑިޒާސްޓަރ މެނޭޖްމެންޓް އޮތޯރިޓީ، (އެން.ޑީ.އެމް.އޭ)އިން ވިދާޅުވެއްޖެއެވެ.

އެންޑީއެމްއެމްއޭއިން ވިދާޅުވީ، އެދުވަހު ބޯކޮށް ވާރޭ ވެހުމުގެ ސަބަބުން 227 ގެއަކަށް ފެންވަަދެ ގެއްލުންތައް ލިބުނު ކަމަށެވެ. އޭގެ ތެރޭގައި ޑިސެމްބަރު މަހުގެ 31 ވަނަ ދުވަހު ބޯކޮށްވާރޭވެހި ހިނގި ފެންބޮޑުވުމުގެ ހާދިސާގައި ގެއްލުން ލިބުނު، 20 ގެއެއްވެސް ހިމެނޭ ކަމަށެވެ. އަދި 18 ގެއެއްގެ 110 މީހުން ވަގުތީ ހިޔާވަހިކަމަށް ބަދަލުކުރެވުނު ކަމަށާއި، ފެންބޮޑުވުމުގެ ހާދިސާ އާއި ގުޅިގެން 78 ގޭބިސީއެއްގެ އެސެސްމެންޓް ހެދުމަށް ނިންމައި އޭގެ ތެރެއިން 53 ގޭބިސީއެއްގެ އެސެސްމެންޓް ނިމިފައިވާ އެންޑީއެމްއޭއިން ވިދާޅުވިއެވެ.

އެންޑީއެމްއޭއިން ވިދާޅުވީ، ވިއްސާރަ އާއި ގުޅިގެން ޒަރޫރީ ހިފާގެންގުޅޭ ތަކެއްޗާއި، ސްޓްރަކްޗަރަލް ގެއްލުންތަކުގެ އަގު، 1،111،842.50ރ (އެއްމިލިޔަން އެއްލައްކަ އެގާރަހާސް އަށްސަތޭކަ ސާޅީސްދެ ރުފިޔާ ފަންސާަސް ލާރި)އަށް އަރާކަމަށެވެ. އަދި އެސެސްމެންޓް ހެދުނު ގެތަކަށް ކާރިސާތަކުަގއި އިންސާނީ އެހީ ފޯރުކޮށް ދިނުމުގެ އުޞޫލުގެ ތެރެއިން އެހީގެ ގޮތުގައި، 711،541.70ރ (ހަތްލައްކަ އެގާރަހާސް ފައްސަތޭކަ ސާޅީސް އެއްރުފިޔާ ހަތްދިހަ ލާރި)ދިނުމަށް ނިންމާފައިވަ ކަމަށެވެ. އޭގެ ތެރޭގައި ހިމެނެނީ، ޒަރޫރީ ހިފާގެންގުޅޭ ތަކެއްޗަށް ޖުމުލަ ގެއްލުމުގެ %20އަށް ވާ، 100،075.20ރ (އެއްލައްކަ ހަތްދިހަ ފަސްރުފިޔާ ވިހި ލާރި) އާއި ސްޓްރަކްޗަރަލް ގެއްލުންތަކަށްދޭ 611،466.50ރ (ހަލައްކަ އެގާރަހާސް ހަތަރުސަތޭކަ ފަސްދޮޅަސް ހަ ރުފިޔާ ފަންސާސް ލާރި) ކަމުގައި އެންޑީއެމްއޭއިން ވަނީ ވިދާޅުވެފައެވެ.

އެންޑީއެމްއޭއިން ވިދާޅުވީ، ގާތްގާތުގައި ފެންބޮޑުވުމުގެ ދެ ހާދިސާއެއް ހިނގުމާއި ގުޅިގެން ގޭބިސީތަކަށް ލިބުނު ގެއްލުންތައް ބޮޑުކަމަށް ވަނީ ފާހަގަކުރެވިފައި ކަމަށާއި، ސްޓްރަކްޗަރަލް ގެއްލުންތައް އެންމެ ބޮޑަށް ލިބިފައިވާ ގެތަކުގެ މައުލޫމާތު އެއްކޮށް ކަމާއި ބެހޭ މުއައްސަސާތަކަށް ހިއްސާކުރާނެ ކަމުގައިވެސް އެންޑީއެމްއޭއިން ވަނީ ވިދާޅުވެފައެވެ.