Advertisement
ރާއްޖޭގަިއ ހުންނަވާ އިންޑިއާ ސަފީރާއި އިންޑިއާ ހައިކޮމިޝަންގައި ތިބޭ ބައެއް ވެރިން --- ފޮޓޯ: އިންޑިއާ އެމްވަސީ
އިންޑިއާ ސިފައިން ރާއްޖެއިން ބޭލުމާއި ގުޅޭ ގޮތުން ރާއްޖެއާ އިންޑިއާއިން ރަސްމީ މަޝްވަރާތައް ފަށައިފި
ދިވެހިރާއްޖެއާ އިންޑިއާ ސަރުކާރުގެ މަތީ ފަންތީފެންވަރުގެ ވެރިންގެ މަޝްވަރާއްތައް މިއަދު ފަށައިފިއެވެ.
އެނގިފައިވާ ގޮތުގައި ދެޤައުމުގެ ސަރުކާރުގެ އިސްވެރިންގެ މެދުގައި މިއަދު ކުރިޔަށްދާ މި މަޝްވަރާ ބައްދަލުވުމަކީ، ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމާއި ގުޅޭ ގޮތުން ދެޤައުމުގެ ދެމެދުގެ އިސްވެރިންގެ މެދުގައި ރަސްމީ މަޝްވަރާތައް ބޭއްވުމަށް ކޮމިޓީއެއް އެކުލަވާލުމަށް، ކޮޕް-28ގެ ހަވާސާގެ ތެރޭގައި، ރައީސުލްޖުމްހޫރިއްޔާ އިންޑިއާގެ ބޮޑުވަޒީރާއިއެކު ބޭއްވެވި ބައްދަލު ކުރެއްވުމަށްފަހުގައި އެކުލަވާލައްވަން ނިންމެވި ކޮމިޓީގެ ބައްދަލުވުމެކެވެ. އެހެން ނަމަވެސް ދެ ޤައުމުގެ އިސްވެރިންގެ މެދުގައި ކުރިޔަށްދާ މަތީ ފެންވަރުގެ މިބައްދަލުވުމުގައި މަޝްވަރާ ކުރެވޭނެ ކަންކަމާއި ގުޅޭ ގޮތުން މިހާތަނަށް ފޮރިން މިނިސްޓްރީންވެސް އަދި ސަރުކާރުންވެސް އެއްވެސް އެއްޗެއް ހާމަކޮށްފައެއް ނުވެއެވެ.
ރާއްޖެއާ އިންޑިއާގެ ގުޅުން ވަރަށް ބޮޑަށް ނުތަނަވަސްވެ ނާޒުކު ހާލަތަކަށް ގޮސްފައި ވާއިރު، ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހުގައި އިއްޔެ ރާއްޖެ ވަޑައިގެން ދެއްވި ނޫސް ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ، ނުސީދާ ބަހުން އިންޑިއާއަށް ވަރަށް ބޮޑަށް ފާޑު ވިދާޅުވެފައެވެ.
އިންޑިއާ ސިފައިން ރާއްޖެއިން ފޮނުވާލުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ މައިގަނޑު އެއް ރިޔާސީ ވަޢުދެވެ. ރައީސުލްޖުމްހޫރިއްޔާ ވިދާޅުވެފައިވާ ގޮތުގައި، ރާއްޖޭގައި ތިބި އިންޑިއާ ސިފައިން އަނބުރާ ޤައުމަށް ގެންދިޔުމަށް ދިވެހި ސަރުކާރުން މިހާރު ވަނީ އިންޑިއާ ސަރުކާރަށް އަންގާފައެވެ. އަދި ރާއްޖޭގައި ތިބޭ އިންޑިއާ ސިފައިންގެ އެހީގައި ކުރިން ހިންގަމުން އައި ބަލިމީހުން އެއްތަނުން އަނެއްތަނަށް އުފުލުމާއި ރާއްޖޭގެ ސަރަހައްދު ވައިގެމަގުން ބެލެހެއްޓުމުގައި އިންޑިއާ ސިފައިން ބޭނުން ކުރުންވެސް ވަނީ ހުއްޓާލާފައި ކަމަށް މައުލޫމާތު ލިބިފައިވެއެވެ.
