މި އަހަރުގެ ހޫނު ދުވަސްވަރު، މެދުނުކެނޑި ރައްޔިތުންނަށް ކަރަންޓު ލިބޭނެ މަގު ފަހިކޮށްދިނުމަށް ސްޓެލްކޯއިން 2 ޖަނަރޭޓަރު ސެޓު ގެނެސްފިއެވެ.

ސްޓެލްކޯއިން ބުނީ މި އަހަރުގެ ހޫނު މޫސުން (ޕީކް ސީޒަން) އަށް ތައްޔާރުވުމަށްޓަކައި، ގެނައުމަށް ހަމަޖެހިފައިވާ ޖެނަރޭޓަރު ސެޓްތަކުގެ ތެރެއިން 1.6 މެގަވޮޓްގެ 2 ހައިސްޕީޑް ކޮންޓެއިނާ ޖަނަރޭޓަރު ސެޓް އިއްޔެ ރާއްޖެ ގެނެސްފައިވާ ކަމަށެވެ.

އަދި މިހާރު އެ ޖަނަރޭޓަރު ސެޓްތައް ބެހެއްޓުމުގެ މަސައްކަތް ފަށާފައިވާ ކަމަށާއި އިތުރު ދެ ސެޓު ގެންނަން ހަމަޖެހިފައިވާ ކަމަށެވެ. ޖުމްލަ ހަތަރު ސެޓާ އެކު 6.4 މެގަވޮޓުގެ ކަރަންޓު އިތުރަށް އުފެއްދޭނެ ކަމަށް ސްޓެލްކޯއިން ބުންޏެވެ.

ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ އެ ކުންފުނި އަބަދުވެސް ދެމި އޮންނާނީ ރައްޔިތުންނަށް ފުރިހަމަ ހިދުމަތެއް ފޯރުކޮށް ދިނުމުގައި ކަމަށެވެ.

އެ ކުންފުނިން ހިންގަން ރާވާފައިވާ މާލެ ސަރަހައްދުގެ ބިޔަ ޕަވާ ޕްރޮޖެކްޓު، ސިކްސްތު ޕަވާ ޑިވެލޮޕްމަންޓުގެ އަމަލީ މަސައްކަތް ވަރަށް އަވަހަށް ފަށާނެ ކަމަށް ވެސް އޭނާ ވިދާޅުވި އެވެ.