ދިވެހިރާއްޖެއާއި ޗައިނާއާ ދެމެދު އޮންނަ ޒަމާންވީ ގާތްގުޅުމަކީ އެއްބަޔަކު އަނެއްބަޔަކަށް އިޙްތިރާމުކުރުމުގެ މައްޗަށް ބިނާވެފައިވާ ނަމޫނާ ގުޅުމެއްކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާގެ ދެކަނބަލުން ޗައިނާއަށް ކުރެއްވި ފުރަމާނަ ދަތުރުފުޅަށްފަހު މާލެ ވަޑައިގެން ވެލާނާ އިންޓަރނޭޝަނަލް އެއާޕޯޓުގައި ނޫސްވެރިންނާއި ބައްދަލުކުރައްވައި ދެއްވި ނޫސްބަޔާނުގައެވެ.

ދިވެހިރާއްޖެއަ ޗައިނާގެ ގުޅުމުގެ މައްޗަށް އަލިއަޅުއްވާލައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޗައިނާއަކީ، ރާއްޖެއަށް އިޙްތިރާމް ކުރާ ޤައުމެއް ކަމަށާއި، އަދި ރާއްޖޭގެ ދާޚިލީ ކަންކަމުގެ ތެރެއަށް ނުފޫޒުފޯރުވާ ޤައުމެއް ނޫންކަމުގައި ވިދާޅުވިއެވެ. މިގޮތުން ޗައިނާ އާއި ދިވެހިރާއްޖޭގެ ގުޅުން ބިނާވެފައި އޮތީ މައިގަނޑު، 4 އަސާސެއްގެ މައްޗަށްކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ، ދެ ޤައުމުގެ ދޭތެރޭގައި މި އޮންނަ ގުޅުން ބިނާވެގެންވަނީ، މައިގަނޑު ހަތަރު ޕްރިންސިޕަލެއް ނުވަތަ އަސާސެއްގެ މައްޗަށްް ކަމަށާއި، އެ އަސާސްތަކަކީ. ނިއުޓްރަލް ރެސްޕެކްޓް، ސޮވްރިންގ އިކުއަލިޓީ، ޓެރިޓޯރިއަލް އިންޓެގްރިޓީ، ނަން އިންޓަރފިއަރެންސް އިން އިންޓަރނަލް މެޓަރސް ކަމަށެވެ.

ރައީސުލްޖުމްހޫރިއްޔާ ވިދާޅުވީ، ކޮންމެ ޤައުމަކާއެކުވެސް ދިވެހިރާއްޖެއިން ބާއްވާ ގުޅުންތައް ބިނާވެފައި އޮންނާނީ މި ހަތަރު އަސާސްގެ މައްޗަށް ކަމުގައެވެ.

ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު، މާލެވަޑައިގެން ދަތުރުފުޅާއި ގުޅޭ ގޮތުން ރައީސުލްޖުމްހޫރިއްޔާ ދެއްވި ނޫސް ބަޔާނުގައި ވަނީ، އިންޑިއާއަށް ނުސީދާ ގޮތެއްގައި ބަހުގެ ހަމަލާތައް ދެއްވާފައެވެ. އަދި ރާއްޖެއިން އިންޑިއާގެ މައްޗަށް ބަރޯސާވުން ކުޑަކުރުމަށް އެފަދަ ދާއިރާތަކުން އެޅުއްވުމަށް ސަރުކާރުން ކުރެއްވުމަށް ރާވާފައިވާ ބައެއް ކަންކަމާއި ގުޅޭ މައުލޫމާތުވެސް އެމަނިކުފާނު ވަނީ ހާމަ ކުރައްވާފައެވެ.