މިހާރު ރައީސުލްޖުމްހޫރިއްޔާ ކަމުގެ މަޤާމުގައި ހުންނެވި، ޑރ. މުއިއްޒަށް ކުރިން މާލޭގެ މޭޔަރުގެ މަޤާމަށް ވަޑައިގެންނެވުނީވެސް އަދި، ރައީސުލްޖުމްހޫރިއްޔާކަމުގެ މަޤާމަށް ވަޑައިގެންނެވުނީވެސް އެމަނިކުފާނަށް އޮތް ތާއީދުގެ ސަބަބުން ނޫންކަމުގައި އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ، މާލޭ ސިޓީ ކައުންސިލްގެ މޭޔަރުކަމުގެ މަޤާމު އެމްޑީޕީއަށް ކާމިޔާބުވުމާއި ގުޅިގެން މިރޭ ބޭއްވި އެއްވުމަށްފަހުގައި، ނޫސްވެރިންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ޑރ. މުއިއްޒު މާލޭ ސިޓީގެ މޭޔަރުކަމުގެ ގޮޑި ދޫކޮށްލައްވައި، ރައީސުލްޖުމްހޫރިއްޔާ ކަމުގެ މަޤާމަށް ވަޑައިގެންނެވިތާ، ދެމަސްވެސް ނުވަނީސް އެމަނިކުފާނުގެ ޕާޓިއަށް އަދި އެމަނިކުފާނު ތާއީދުކުރެއްވި ކެންޑިޑޭޓަށް ވަނީ ނާކާމިޔާބީއާ ކުރިމަތިވެފައެވެ. އަދި މީގެ 58 ދުވަސްކުރިން ރައީސް ޑރ. މުޙައްމަދު މުޢިއްޒު ހުންނެވި މަޤާމު އެމަނިކުފާނުގެ ޕާޓީއަށް ކާމިޔާބު ނުކުރެވުމަކީ، ސިޔާސީ ގޮތުން ކުރިމަތިވެވަޑައިގަންނަވާ ވަރަށް ބޮޑު ގޮންޖެހުމެކެވެ.

ފައްޔާޒު ވިދާޅުވީ މީގެ 2 އަހަރު ކުރިން ބޭއްވި މާލޭ ސިޓީކައުންސިލްގެ އިންތިޚާބުގައި އެމްޑީޕީއަށް މޭޔަރުގެ ގޮނޑި ކާމިޔާބު ނުކުރެވުނީވެސް އަދި، ނިމިދިޔަ ރިޔާސީ އިންތިޚާބު ކާމިޔާބު ނުކުރެވުނީވެސް ޕާޓީގެ އެތެރޭގައި ހިނގަމުން އައި ދެބަސްވުންތަކުގެ ސަބަބުން ކަމަށެވެ. ލޯކަލް ކައުންސިލްތަކުގެ އިންތިޚާބު ކުރިމަތިވިއިރު، ރައީސް ނަޝީދު ހުންނެވީ ސަރުކާރާއި ދެކޮޅަށެވެ. އަދި ޕާޓީގެ ތެރޭގައި އޮތް ޚިޔާލުތަފާތުވުމުގެ ސަބަބުން އެމްޑީޕީގެ އާއްމު މެމްބަރުންގެ ތެރެއިން ގިނަ ބަޔަކު ވޯޓުލާން ނުވެސް ނުކުމެއެވެ.

ފައްޔާޒު ވިދާލުވީ، ކައުންސިލްތަކުގައި ސަރުކާރުގެ މެމްބަރަކު ނެތި ކަންކަން ނުކުރެވޭނެ ކަމުގައި ސަރުކާރުން ބުންޏަސް އެއީ އެހެން ހިނގާ ކަމެއް ނޫންކަމަށެވެ. އަދި އެމްޑީޕީ ސަރުކާރުގައި ވަރަށް ސާފުކޮށް އެކަން ދައްކައިދީފައި ވާނެ ކަމަށާއި، އެމްޑީޕީއަށް ނިސްބަތް ނުވާ ކައުންސިލަރުން ތިބި ކައުންސިލްތަކަށްވެސް ވަރަށް މިނިވަންކަމާއިއެކު މަސައްކަތް ކުރުމަށް ރައީސް ޞާލިޙްގެ ސަރުކާރުން ފުރުޞަތު ދިންކަމަށެވެ.

މާލޭ ސިޓީކައުންސިލްގެ ބައި އިލެކްޝަންގައި ސަރުކާރަށް ކުރިމަތިވި ނާކާމިޔާބީއަކީ ސުވާލު އުފެދޭވަރުގެ ކަމެއް ނޫންކަމުގައި އެމްޑީޕީގެ އިސްބައެއް މެމްބަރުން ވަނީ ވިދާޅުވެފައެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމަށް އެކަށައަޅައި ކައުންސިލްތައް އިންތިޚާބުކުރަން ފެށީސުރެ އެންމެފަހުން ބޭއްވި ލޯކަލް ކައުންސިލް އިންތިޚާބު ފިޔަވައި ހުރިހާ އިންތިޚާބެއްގައިވެސް މާލޭގެ މެޖޯރިޓީއާ މާލޭ ސިޓީކައުންސިލްގެ މޭޔަރުކަމުގެ ގޮނޑިވެސް ކާމިޔާބުކޮށްފައި ވަނީ އެމްޑީޕީންނެވެ.