މާލޭ ސިޓީގެ މޭޔަރުކަން ކާމިޔާބު ކުރުމަށްފަހު އެމްޑީޕީން ސިޔާސީ ގޮތުން ދުއްވައި ގަންނަނީ، މައިތިނުކުރެވޭނެ ވަރަށް ބާރަށް ކަމުގައި ރައްޔިތުންގެ މަޖިލީހުގެ ކުރީގެ ރައީސް އަދި އެމްޑީޕީގެ މެމްބަރު، ނ.ޢ.ޢ.ވ ޢަބުދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ މާލޭ ސިޓީގެ މޭޔަރުކަމުގެ ގޮނޑި އެމްޑީޕީއަށް ކާމިޔާބުވުމުގެ އުފާ ފާޅުކުރުމަށް އެމްޑީޕީން މިރޭ ސަލްޓަންޕާކުގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

ޝާހިދު ވިދާޅުވީ، މާލެ ކާމިޔާބު ކުރުމަށްފަހު ދެން އެމްޑީޕީން އެ ނުކުންނަނީ އަތޮޅުތައް ކާމިޔާބު ކުރުަމަށް ކަމަށެވެ. 

ޢަބުދުﷲ ޝާހިދުގެ ވާހަކަފުޅުގައި، އެމަނިކުފާނު ވަނީ އިންތިޚާބުގެ ވޯޓުލުމުގެ ކަންކަން ހިނގަމުން ދަނިކޮށް ރައީސް ޑރ. މުޢިއްޒު ޗައިނާއިން ވަޑައިގެން ބޭއްވި ނޫސްވެރިންގެ ބައްދަލުވުމުގައ ދެއްކެވި ވާހަކަފުޅުގައި ރާއްޖޭގެ ކޮންމެ ގޭބިސީއަކަށް ހަނޑޫ ބަސްތާއަކާއި ފުށްބަސްތާއެއް ދޭން ބުނީ ވޯޓަށް ނުފޫޒު ފޯރުވުމުގެ ގޮތުންކަމަށް ތުހުމަތު ކުރައްވާފައެވެ. އަދި މާލޭގެ ރައްޔިތުންނަށް ހައްޤު މިންވަރަކީ، ހަނޑޫ ބަސްތާއަކާއި ފުށްބަސްތާއެއް ނޫންކަމަށާާއި، މާލޭ ރައްޔިތުންނަށް ހައްޤު މިންވަރަކީ، ރައީސް ޞާލިޙްގެ ސަރުކާރުން މާލޭގެ ރައްޔިތުންނަށް ދޭން ނިންމާފައިވާ ގޯތިތަކާއި، ފްލެޓްތައް އެރައްޔިތުންނަށް ލިބުންކަމުގައި ޝާހިދު ވިދާޅުވިއެވެ.

ޝާހިދުގެ ވާހަކަފުޅުގައި މިސަރުކާރުގެ ސިޔާސަތުތަކަށް ވަނީ ވަރަށް ބޮޑަށް ފާޑުވިދާޅުވެފައެވެ.