މުޅި ރާއްޖެ މި ސަރުކާރަށް ނޫނެކޭ ބުނާ ތަން ފެނުން އޮތީ ވަރަށް ކައިރީގައި ކަމަށް އެމްޑީޕީގެ ރައީސް އަދި ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އެމްޑީޕީއަށް މާލޭ ސިޓީ ކައުންސިލްގެ މޭޔަރުކަމުގެ ގޮނޑި ކާމިޔާބުވުމުގެ އުފާފާޅުކުރުމަށް މިރޭ މާލޭޭ ސަލްޓަންޕާކުގައި އެމްޑީޕީން ބޭއްވި އެއްވުމުގައި ވާހަކަފުޅު ދައްކަވަމުންނެވެ.

މިބައްދަލުވުމުގައި ރައީސް ޞާލިޙް ވަނީ، މޭޔަރުގެ ގޮނޑި ކާމިޔާބު ކުރެއްވި އާދަމް އާޒިމާއި ބައްދަލު ކުރައްވައި މަރުޚަބާ ވިދާޅުވެފައެވެ.

އެމްޑީޕީގެ އާއްމު މެމްބަރުންނާއި މުޚާތަބު ކުަރައްވައި ވާހަކަފުޅު ދައްކަވަމުން ރައީސް ވިދާޅުވީ، މިސަރުކާރު ވެރިކަމަށް އައީ ރައްޔިތުންނަށް ދޮގުހަދައި އޮޅުވާލައި އަދި، ރައްޔިތުންގެ ހިއްތަކުގައި ނަފްރަތު އުފައްދައިގެން ކަމަށެވެ. އަދި މިއަދުވެސް އެމަނިކުފާނު ކުރައްވަމުން އެގެންދަވަނީ އެކަން ކަމުގައި ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ، މާލޭގެ ރައްޔިތުން މިސަރުކާރުގެ ސިޔާސަތުތަކަށް ނޫނެކޭ އެބުނީ ސަބަބެއް ނެތި ނޫންކަމަށެވެ. އަދި ވެރިކަމަށް އައުމަށް ހެދި ދޮގުތަކާއި އޮޅުވާލުންތަކާއި އުފެއްދި ނަފުރަތު މިއަދު ހާމަވެ، ރައްޔިތުންނަށް ސަރުކާރުގެ އަސްލު ސިފަ ހާމަވާން ފަށައިފިކަމުގައިވެސް ރައީސް ޞާލިޙް ވިދާޅުވިއެވެ.

ރައީސް ޞާލިޙްގެ ވާހަކަފުޅުގައި ވަނީ، އެމަނިކުފާނުގެ ސަރުކާރުން މާލޭގެ ރައްޔިތުންނަށް ދިން ގޯތިތަކާއި ފްލެޓްތައް މިއަދުން މިއަދަށް ހަވާލުކުރެއްވުމަށް ގޮވާލައްވާފައެވެ.