މިއަދު ބޭއްވި މާލޭ ސިޓީ ކައުންސިލްގެ މޭޔަރު ހޮވުމުގެ ބައި-އިލެކްޝަންގައި ވޯޓުލުމަށް އިލެކްޝަންސް ކޮމިޝަނުން ވަގުތު އިތުރުކޮށްފައި އޮތުމުން ރައީސުލްޖުމްހޫރިއްޔާއަށް އެ އިންތިޚާބުގައި ވޯޓުލުމުގެ ފުރުޞަތު ލިބިވަޑައިގެންފިއެވެ.

ވޯޓުލުމުގެ ވަގުތަށް އިލެކްޝަންސް ކޮމިޝަނުން އެއްގަޑިއިރު އިތުރު ކުރީ، މިއަދު ވިއްސާރަ ވާނޭ ކަމަށް ލަފާކޮށެވެ. މިގޮތުން ރޭ ވަނީ ކުރިން 4:00ގައި ވޯޓުލުން ނިންމާގޮތަށް އޮތް އޮތުން ބަދަލުކޮށް ހަވީރު 5:00 އާއި ހަމައަށް ވޯޓުލުމުގެ ވަގުތު އިތުރުކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަރިހުގައި ވަޑައިގެންނެވި ޓީމުގެ ބޭފުޅުންނަށް ވެލާނާ އިންޓަރނޭޝަނަލް އެއާޕޯޓަށް ފޭބުނީ މެންދުރުފަހު 3:00 ޖެހުމާއި ގާތްވެފައި ވަނިކޮށެވެ. އެއާޕޯޓުގައި ބޭއްވި ނޫސްވެރިންގެ ބައްދަލުވުން ނިންމަވާލެއްވުމަށް ފަހު ރައީސުލްޖުމްހޫރިއްޔާ އެއާޕޯޓުން ވަޑައިގެންނެވީ 3:45 ހާއިރުގައެވެ. 

އެމަނިކުފާނު، ވޯޓުލެއްވީ ސޯޝަލް ސެންޓަރުގައި ބަހައްޓާފައިހުރި މާފަންނު ދެކުނު-3 (T17.3) ނަންބަރު ވޯޓު ފޮށްޓަށެވެ.

މާލޭ ސިޓީގެ މޭޔަރުގެ އިންތިޚާބު ކާމިޔާބުކޮށްފައި ވަނީ އިދިކޮޅު އެމްޑީޕީންނެވެ.