ދިވެހިތާއްޖެއާ އިންޑިއާގެ ޒަމާންވީ ގުޅުމުގެ ތެރެއިން، އިޤުތިޞާދީ ގޮތުންނާއި އެހެނިހެން ގޮތް ގޮތުން ދިވެހިރާއްޖެއިން އިންޑިއާއަށް ބަރޯސާވެފައި އޮތް އޮތުން ދޫކޮށްލައްވާނެ ކަމުގެ އިޝާރާތެއް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ކުރައްވައިފިއެވެ.

ޗައިނާއަށް ކުރެވި ހަތަރު ދުވަހުގެ ފުރަމާނަ ދަތުރުފުޅު ނިންމަވާލެއްވުމަށްފަހު، މާލެވަޑައިގެން ނޫސްވެރިންނާއި ބައްދަލުކުރައްވައި ދެއްވި ބަޔާނުގައި އެމަނިކުފާނު ވަނީ، އިންޑިއާގެ ނަން ވިދާޅުނުވެ އެހެން ނަމަވެސް އިންޑިއާއަށް ނިސްބަތްވާ ގޮތަށް ބަހުގެ ހަމަލާތަކެއް ދެއްވާފައެވެ.

މިގޮތުން ދިވެހިރާއްޖެ އޮތް ކަނޑަކީ ވަކިބައެއްގެ ކަނޑެއް ނޫންކަމަށާއި، އަދި ދިވެހިރާއްޖެއަކީ ވަކި ޤައުމެއްގެ ބެކްޔާޑުގައި އޮތް ޤައުމެއް ނޫންކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.

ސިއްޙީ ފަރުވާގައި ދިވެހިރާއްޖެ އިންޑިއާއަށް ވަރަށް ބޮޑަށް ބަރޯސާވެފައި އޮތް އިރު ރައީސުލްޖުމްހޫރިއްޔާ ވިދާޅުވީ، މިހާރު އާސަންދަ ލިބޭ ޤައުމުތައް ނޫން ޤައުމުތަކަށް އާސަންދަ ފުޅާކުރައްވާނެ ކަމަށާއި މިގޮތުން، ދުބާއީ އާއި ތައިލެންޑް ފަދަ ޤައުމުތަކުން އާސަންދައިގެ ދަށުން ބޭސްފަރުވާ ކުރެވޭނެ ގޮތް ހަމަޖައްސަވާނެ ކަމަށެވެ. އަދި އެގޮތަށް ހަމަޖައްސަވާއިރު، ހަމަޖެހިގެންދާނީ، ބޭސްފަރުވާއަށްދާ ފަރާތްތަކުގެ އެކަމަޑޭޝަން ޚަރަދުތައްވެސް ކަވަރުކުރެވޭ ގޮތަށް ކަމުގައިކަން އެމަނިކުފާނު ފާހަގަކުރެއްވިއެވެ.

އަސާސީ ކާބޯތަކެތި އިންޕޯޓު ކުރުމުގައިވެސް ރާއްޖެއިން އިންޑިއާއަށް ބަރޯސާވެފައި ވާއިރު، ރައީސް ވިދާޅުވީ، ހަނޑޫ ހަކުރުފުށް ތުރުކީން ރާއްޖެއަށް އެތެރެކުރުމަށް އެއްބަސްވެވި އެކަމުގެ މަސައްކަތްތައްވެސް މިހާރު ހިނގަމުންދާ ކަމަށެވެ. އަދި ފުރަތަމަ ފަހަރަށް ރޯދަމަހަށް ބޭނުންވާ ކާބޯތަކެތީގެ ތެރެއިން ފުށާއި ހަނޑޫ ސަރުކާރުން ކޮންމެ ގޭބިސީއަކަށް ހިލޭ ފޯރުކޮށްދޭނެ ކަމުގައިވެސް އެމަނިކުފާނު ވިދާޅުވިއެވެ. މިގޮތުން ކޮންމެ ގޭބިސީއަކަށް 10 ކިލޯ ހަނޑުލާއި ފުށް ސަރުކާރުން ދެއްވާނެ ކަމުގައި ރައީސް ވިދާޅުވިއެވެ.

ބަލިމީހުން އުފުލުމުގައ މިހާތަނަށް ރާއްޖޭގައި ތިބޭ އިންޑިއާ ސިފައިން ދުއްވާ ހެލިކޮޕްޓަރުތަކާއި ޑޯނިއާ މަތިންދާބޯޓަށް ބަރޯސާވެފައި އޮތް އިރު ރައީސް ވިދާޅުވީ، އެއާ އެމްބިއުލާންސްގެ ޚިދުމަތް މާޗުމަހުގެ ތެރޭގައި ފެށިގެން ދާނީ ޑޭޝް-8ގެ މަތިންދާ ބޯޓެއްގައި ކަމަށެވެ. އަދި އެެއާރ އެމްބިއުލާންސްގެ ގޮތުގައި އެބޯޓު މުޅި ރާއްޖޭގައި އުދުހުމުގެ އިތުރުން، ރާއްޖެއިން ބޭރަށް ބަލިމީހުން އުފުލުމުގައިވެސް އެބޯޓު ބޭނުން ކުރެވޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ކަމުގެ މަޤާމަށް ޑރ. މުޙައްމަދު މުޢިއްޒު ވަޑައިގެންނެވި ހިސާބުން އިންޑިއާ އާއި ރާއްޖޭގެ ޚާރިޖީ ގުލުންތައް ވަނީ ގޯސްވެފައެވެ. އަދި ރައީސް މުއިއްޒުގެ ސަރުކާރުގެ 3 ނައިބު ވަޒީރަކު އިންޑިއާގެ ބޮޑުވަޒީރަށާއި އެޤައުމުގެ ރައްޔިތުންނަށް ފުރައްސާރަ ކުރި މައްސަލައިގައި، އިންޑިއާއިން ވަނީ، ރާއްޖެ ބޮއިކޮޓް ކުރުމުގެ ބޮޑު ކެމްޕޭނެއްވެސް ފަށާފައެވެ.