ޗައިނާ ސަރުކާރުން ހިލޭ އެހީގެ ގޮތުގައި ރާއްޖެއަށް 130 މިލިޔަން ޑޮލަރު ދިނުމަށް ނިންމާފައިވާ ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޗައިނާއަށް ކުރެއްވި 4 ދުވަހުގެ ފުރަމާނަ ދަތުރުފުޅު ނިންމަވާލެއްވުމަށްފަހު މިއަދު މާލެ ވަޑައިގެން ވެލާނާ އިންޓަރނޭޝަން އެއާޕޯޓުގައި ނޫސްވެރިންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖެއަށް ގާތްގަނޑަކަށް އެއްބިލިއަން ޔުއާން ދިނުމަށް ނިންމަވާފައިވާ ކަމަށެވެ. އެއީ އެމެރިކާ ޑޮލަރުން ބަލާނަމަ ގާތްގަނޑަކަށް 130 މިލިއަން ޑޮލަރުކަން އެމަނިކުފާނު ފާހަގަކުރެއްވިއެވެ. މިގޮތުން މިއެހީ ބޭނުން ކުރެވޭނީ ސަރުކާރުން ކަނޑައަޅާ ތަރައްޤިގެ މަޝްރޫޢުތައް ހިންގުމަށް ކަމަށާއި އޭގެ ތެެރެއިން އެންމެ ގިނަ ފައިސާ ޚަރަދުވާނީ، މާލޭގެ މަގުތައް ހެދުމަށް ކަމުގައިވެސް ރައީސް ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ޗައިނާއިން ދޭ ހިލޭ އެހީގައި ދިވެހިރައްޔިތުންނަށް ފައިދާ ހުރި ގިނަ މަސައްކަތްތަކެއް ކުރެވިގެންދާނެ ކަމަށެވެ. މީގެ އިތުރުން ޗައިނާ އާއި އެކު އެކި ދާއިރާތަކުން 20 ވުރެ ގިނަ އެއްބަސްވުންތަކުގައި ސޮއެކުރެވުނުކަން ފާހަގަކުރައްވައި އެއްބަސްވުންތަކުގެ ތަފްސީލްތައްވެސް ރައީސުލްޖުމްހޫރިއްޔާ ހިއްސާކުރެއްވިއެވެ.

މީގެ އިތުރުން ޗައިނާގެ ފޫޖިއާންގައި ކުރެވުނު އެންމެ މުހިއްމު ކަމަކީ، މޯލްޑިވްސް އިންވެސްޓް ފޯރަމްކަން ފާހަގަކުރައްވައި އެއީ ވަރަށް ކާމިޔާބު ފޯރަމެއް ކަމުގައި ވިދާޅުވިއެވެ. މިގޮތުން އެފޯރަމްގައި ޗައިނާގެ 300 ވުރެ ގިނަ ކުންފުނިން ބައިވެރިވިކަންވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ ފާހަގަކުރައްވާފައެވެ.

ރައީސުލްޖުމްހޫރިއްޔާ ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހުގައި ރާއްޖެ ވަޑައިގެންނެވީ މިއަދު މެންދުރުފަހުގައެވެ.