މިހާރު ރާއްޖެއަށް ކުރަމުން މިދާ ވިއްސާރައިގައި އިއްޔެ މާލެއަށް ވާރޭ ވެހުނު މިންވަރު، އެންމެ ފަހުން މާލޭގައި ފެންބޮޑުވި ޑިސެމްބަރު މަހުގެ 31 ވަނަ ދުވަހަށް ވުރެ އިތުރު ކަމުގައި މޫސުމާއި ބެހޭ އިދާރާއިން އާއްމު ކުރި ތަފާސް ހިސާބުތަކުން ދައްކައިފިއެވެ.

އިއްޔެއަކީ މިފަހުގެ ތާރީޚުގައި އެންމެ ގިނައިން މާލެއަށް ވާރޭ ވެހުނު ދުވަހެވެ. އިއްޔެ މާލެއަށް މާލެއަށް 159.3 މިލިމީޓަރުގެ ވާރޭ ވެހުނު އިރު، މާލެ ފެންބޮޑުވި ޑިސެމްބަރު މަހުގެ 31 ވަނަ ދުވަހު މާލެއަށް ވެހުނީ 118.2 މިލިމީޓަރުގެ ވާރެއެވެ.

އިއްޔެ ހެނދުުން ފެށިގެން މާލެއަށް ބޯކޮށް ވާރޭ ވެހުމުގެ ސަބަބުން މާލޭގެ ގިނަ ސަރަހައްދުތަކުގައި ފެންބޮޑުވެ، ފިހާރަތަކާއި ގޭގެއަށް ވަދެ ގެއްލުންތައް ލިބުނެވެ.

ފެން ހިއްކުމުގައި ސިފައިން ހަރަކާތްތެރިވި އިރު، މާލޭގެ އެކި ސަރަހައްދުތަކުގައި ޕަންޕްތައް ބަހައްޓައިގެން ޖުމުލަ، 27449 ޓަނުގެ ފެން މާލޭގެ މަގުތަކުން ބޭރު ކުރެވުނު ކަމަށާއި، 176 ގެއެއްގައި ވެލިބަސްތާތައް ޖަހައި ދެވުނު ކަމުގައި އެމްއެންޑީއެފުން ވަނީ ބުނެފައެވެ.

މިއަދު މާލެ ސަރަހައްދަށް އާއްމުގޮތެއްގައި މޫސުމް ރަނގަޅުވި ނަމަވެސް، މިއަދުވެސް ވާރޭ ވެހޭނެ ކަމަށް މޫސުމާއި ބެހޭ އިދާރާއިން ވަނީ ނިމުތުކޮށްފައެވެ.