އިންގްލިޝް ޕްރިމިއަރ ލީގުގެ މި ސީޒަނުގެ ފަހު ދުވަހު ޑޮކޯރޭގެ ގޯލަކުން ބޯނެމައުތް ބަލިކޮށް އެވަޓަން ރެލިގޭޝަނުން ސަލާމަތްވެއްޖެއެވެ.  އަދި އެސްޓަން ވިލާ ޔޫއެފާ ކޮންފަރެންސް ލީގަށް ކޮލިފައިވީ، މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ބްރައިޓަން 2-1 ގެ ނަތީޖާ އަކުން ބަލިކޮށްގެނެވެ.

 ސީޒަންގެ ފަހު މެޗަށް އައިއިރު، ސައުތެމްޕްޓަން ރެލިގޭޓް ވެފައިވީނަމަވެސް، އެވަޓަން، ލެސެސްޓާރ އަދި ލީޑްސް ޔުނަޓެޑަށް ރެލިގޭޝަނުން ސަލާމަތްވުމުގެ ފުރުސަތު އޮތެވެ. ނަމަވެސް އެންމެ ބޮޑު ފުރުސަތެއް އޮތީ އެވަޓަންއަށެވެ. އެއީ، ސީޒަނުގެ ފަހު މެޗުގައި ބޯނެމައުތް ބަލިކޮށްފިނަމަ، އެހެން ނަތީޖާތައް ކޮންމެ ގޮތަކަށް ނިކުތަސް، އެވަޓަންއަށް ރެލިގޭޝަނުން ސަލާމަތްވުމުގެ ފުރުސަތު އޮތުމުންނެވެ. އެވަޓަން އަކީ އަދި މިހާތަނަށް ޕްރިމިއަލީގުން ރެލިގޭޓްވެފައިވާ ކްލަބެއް ނޫނެވެ.

މި ސީޒަނުގައި އެވަޓަން ކާމިޔާބު ކުރި އެންމެ މުހިންމު ގޯލު، މެޗުގެ 57 ވަނަ މިނެޓުގައި ކާމިޔާބު ކުރީ އަބްދުއްލައެ ޑޮކޯރޭ އެވެ. މި ސީޒަނުގެ އޭނާ އެވަޓަންއަށް 25 މެޗު ކުޅެދީފައިވެއެވެ.

އެސްޓަން ވިލާ އިން ޔޫއެފާ ކޮންފަރެންސް ލީގަށް ކޮލިފައިވުމަށް ބްރައިޓަން މެޗު ކޮންމެހެން ކާމިޔާބު ކުރުމަށް މަޖުބޫރެވެ. މި މެޗުގުގައި ގޯލެއް ޖަހާ ފުރަތަމަ ލީޑު ނެގީ ވެސް އެސްޓަން ވިލާ އިންނެވެ. އެއީ މެޗުގެ 8 ވަނަ މިނެޓުގައި ޑޮގްލަސް ލުއިޒް ކާމިޔާބުކުރި ގޯލަކުންނެވެ. އެ ޓީމުން ލީޑު ފުޅާ ކުރީ 26 ވަނަ މިނެޓުގައި ވޮޓްކިންސްގެ ގޯލަކުންނެވެ. ބްރައިޓަންގެ ހަމައެކަނި ގޯލު މެޗުގެ 38 ވަނަ މިނެޓުގައި ކާމިޔާބު ކޮށްދިނީ އެ ޓީމުގެ ބެލްޖިއަމް ފޯވާޑް ޑެނިޒް އުންޑަވްއެވެ.

މި މެޗުން އެސްޓަން ވިލާ މޮޅު ނުވިނަމަ، ލީގުގެ 7 ވަނަ ލިބޭނީ ޓޮޓެންހަމް އަށެވެ. އަދި އޭރުން ޔޫއެފާ ކޮންފަރެންސް ލީގަށް ވެސް ކޮލިފައިވާނީ ޓޮޓެންހަމްއެވެ.