މިއަދު ހެނދުނުންފެށިގެން މާލެއަށް ބޯކޮށް ވާރޭވެހި ފެންބޮޑުވުމާއި ގުޅިގެން މާލޭގެ 8 ގެއަކުން 57 މީހުން ވަގުތީހިޔާތަކަށް ބަަދަލުކޮށްފައިވާ ކަމުގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ހާމަކޮށްފިއެވެ.

އެއޮތޯރިޓީން ބުނީ މިހާރު ކުރަމުންދާ ވިއްސާރައިގައި އެންމެ ބޮޑު ގެއްލުންތަކެއްވެގެން ރިޕޯޓްކުރަމުން ދަނީ ވެރިރަށް މާލެއިން ކަމަށެވެ. މިގޮތުން، 144 ގެއަކުން އެހީތެރިކަމަށް އެދުނު ކަމަށާއި، 91 ގެއެއްގައި ވެލި ބަސްތާތައް ޖެހިފައިވާ ކަމަށެވެ.

މާލޭގެ އިތުރުން، ތ. ގުރައިދޫ، ތ. ދިޔަމިގިލި، ލ. މާމެންދޫ، ދ ކުޑަހުވަދޫގައިވެސް ވިއްސާރަވުމާއި ގުޅިގެން ފެންބޮޑުވެފައިވާ ކަމުގެ ރިޕޯޓްތައް ލިބިފައިވާ ކަމުގައިވެސް އެންޑީއެމްއޭއިން ވަނީ ބުނެފައެވެ.

މާލޭގެ މަގުތަކުގައި ހެދިފައިވާ ފެންގަނޑުތައް ހިންދާލުމަށް ސިފައިން ކުރަމުންދާ މަސައްކަތުގައި ހުކުރު ދުވަހުގެ ރޭ މެންދަމު 12 ޖެހުމާއި ހަމަށް، 18692 ޓަނުގެ ފެން މާލެއިން ބޭރުކުރެވުނު ކަމުގައިވެސް އެމްއެންޑީއެފުން ވަނީ ބުނެފައެެވެ. މީގެ އިތުރުން އެހާތަނަށް 46 ގެއެއްގައި ފެންވަނުން ހުއްޓުވުމަށް ވެލިބަސްތާ ޖަހައިދެވިފައިވާ ކަމުގައިވެސް އެމްއެންޑީއެފުން ބުނެއެވެ.

ހުކުރު ދުވަހުގެ ރޭ މެންދަމު 12 ޖެހި އިރުވެސް މާލޭގެ މާފަންނުގެ ބޮޑުބައެއްގައި އޮތީ ފެންބޮޑުވެފައެވެ. ފެންގަނޑުތައް ހިންދާލުމަށް ކުރިމަތިވި އެންމެ ބޮޑު ގޮންޖެހުމަކީ، މެދުކެނޑުމެއް ނެތި، ބޯކޮށް ވާރޭ ވެހެމުން ދިޔުމެވެ.

މިއަދު ބޯކޮށް ވާރޭވެހި ލިބުނު ގެއްލުންތައް ބަައްލަވާލެއްވުމަށް، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުހައްމަދު ލަތީފާއި ހޯމްލޭންޑް މިނިސްޓަރ ވަނީ ޒިޔާރަތް ކުރައްވާފައެވެ.