ޗައިނާގެ ރައީސް ޝީ ޖިންޕިން ގެ ދައުވަތަކަށް, ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު އެޤައުމަށް ކުރެއްވި ފުރަމާނަ ދަތުރުފުޅު މިއަދު ނިންމަވާލައްވައިފިއެވެ.

ރައީސުލްޖުމްހޫރިއްޔާގެ ދެކަނބަލުން، ޗައިނާއަށް ކުރެއްވި ފުރަމާނަ ދަތުރުފުޅު ފެއްޓެވީ މިޖެނުއަރީމަހުގެ 8 ވަނަ ދުވަހުގައެވެ.

މިދަތުރުފުޅުގައި، ރައީސުލްޖުމްހޫރިއްޔާގެ ދެކަނބަލުން އެންމެ ފުރަތަމަ ވަޑައިގެންނެވީ، ފޫޖިއާން ޕްރޮވިންސަށެވެ. އޭގެ ފަހުން ޗައިނާގެ ވެރިރަށް ބެއިޖިންގއަށް ވަޑައިގެންނެވީ މިމަހުގެ 9 ވަނަ ދުވަހުގައެވެ. ހަތަރު ދުވަހުގެ މި ފުރަމާނަ ދަތުރުފުޅުގެ ތެރެއިން ދެ ޤައުމުގެ މެދުގައި މަތީފެންވަރުގެ ރަސްމީ މަޝްވަރާތައް ބާއްވަވައި، ރާއްޖޭގެ އިޤުތިޞާދީ އަދި ޢުމުރާނީ ތަރައްޤީއާ ގުޅޭ މުހިއްމު ގިނަ އެއްބަސްވުންތަކެއްގައި ވަނީ ސޮއެކުރައްވާފައެވެ. މިގޮތުން ދެޤައުމުގެ މެދުގައި ތަފާތު 20 އެއްބަސްވުމެއްގައި ސޮއެކޮށްފައި ވެއެވެ.

މީގެ އިތުރުން ރައީސުލްޖުމްހޫރިއްޔާގެ ދެކަނބަލުން ވަނީ، ޗައިނާގެ އިޤުތިޞާދީ ތަރައްޤީއާ، ތާރީޚާއި ގުޅޭ ތަންތަނަށްވެސް ޒިޔާރަތްކުރައްވައި އެތަންތަން ބައްލަވާލައްވާފައެވެ.

ރައީސުލްޖުމްހޫރިއްޔާގެ ދެކަނބަލުން، ޗައިނާއަށް ކުރެއްވި ފުރަމާނަ ދަތުރުފުޅުގައި އެ ދެކަނބަލުންގެ އަރިގައި ސަރުކާރުގެ މަތީފެންވަރުގެ ވަފުދެއް ބައިވެރިވިއެވެ.