މާދަމާ ބާއްވާ ބައި-އިލެކްޝަންތަކުގެ ވޯޓުލާ ވަގުތު ހަވީރު 5 ޖެހުމާއި ހަމައަށް އިތުރުކުރުމަށް އިލެކްޝަންސް ކޮމިޝަނުން ނިންމައިފިއެވެ.

އެކޮމިޝަނުން ބުނީ، އިންތިޚާބުތަކުގެ ވޯޓުލުމުގެ ވަގުތު އިތުރުކުރުމަށް ނިންމީ، މުޅި ރާއްޖޭގެ މޫސުން ގޯސްވެ ވިއްސާރަވެ، ވައިގަދަވެ އަދި ކަނޑުގަދަވުމުގެ ސަބަބުން ޢާންމު ދަތުރުފަތުރަށް ބުރޫއަރައި ވޯޓުލުމަށް މީހުން ނިކުތުމަށް ދަތިވާނެތީ ކަމަށެވެ.

އެންމެ ފުރަތަމަ އިއުލާނު ކުރިއރު އިލެކްޝަންސް ކޮމިޝަނުން ނިންމާފައި އޮތީ ހަވީރު ހަތަރެއް ޖަހަންދެން ވޯޓުލުން ކުރިޔަށް ގެންދާ ގޮތަށެވެ.

މާދާމާ އިލެކްޝަންސް ކޮމިޝަނުން ބޭއްވުމަށްނިންމާފައިވާ ބައިއިލެކްޝަން ތަކަކީ،

1- މާލެ ސިޓީ ކައުންސިލްގެ މޭޔަރު އިންތިޚާބު ކުރުމަށް ބާއްވާ ބައި-އިލެކްޝަން.

2- މާލެ ސިޓީ ކައުންސިލްގެ މާފަންނު ދެކުނު ދާއިރާއަށް މެމްބަރަކު އިންތިޚާބު ކުރުމަށް ބާއްވާ ބައި-އިލެކްޝަން.

3- މާލެ ސިޓީ ކައުންސިލްގެ މެދުހެންވޭރު ދާއިރާއަށް މެމްބަރަކު އިންތިޚާބު ކުރުމަށް ބާއްވާ ބައި-އިލެކްޝަން.

4- މާލެ ސިޓީ ކައުންސިލްގެ ހެންވޭރު ދެކުނު ދާއިރާއަށް މެމްބަރަކު އިންތިޚާބު ކުރުމަށް ބާއްވާ ބައި-އިލެކްޝަން.

5- މ. މުލަކު އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް މެމްބަރަކު އިންތިޚާބު ކުރުމަށް ބާއްވާ ބައި- އިލެކްޝަން.

މާދަމާ ބާއްވާ ބައި- އިލެކްޝަންތަކުގެ ވޯޓުލުމުގެ ވަގުތު އިލެކްޝަންސް ކޮމިޝަނުން އިތުރުކޮށްފައި ވާއިރު، މާދަމާވެސް މާލެ ސަރަހައްދަށް މޫސުމް ގޯސްވާނެ ކަމުގައި މޫސުމާއި ބެހޭ ޤައުމީ އިދާރާއިން ވަނީ ބުނެފައެވެ.