ދިރާސީ އަހަރުގެ ކަލަންޑަރަށް ގެނައި ބަދަލާއި މެދު އެމްޑީޕީން ކަންބޮޑުވުން ފާޅުކޮށްފިއެެވެ. 

އެޕާޓީން ނެރެފައިވާ ނޫސް ބަޔާނުގައި ބުނެފައި ވަނީ، ދިރާސީ ކަލަންޑަރަށް އެޑިޔުކޭޝަން މިނިސްޓްރީން ގެނެސްފައިވާ ބަދަލާ ގުޅިގެން ބެލެނިވެރިންނާއި މުދައްރިސުންނާއި އާއްމުންގެ ހުރި ކަންބޮޑުވުންތައް އެ ޕާޓީއަށް  ހުށަހަޅަމުންދާ ކަމަށެވެ. މިގޮތުން އެކަންކަމުގެ މައްޗަށް ބަލައި އެމްޑީޕީން ނެރެފައިވާ ނޫސް ބަޔާނުގައި ވަނީ މައިގަނޑު 5 ކަމެއް ފާހަގަކޮށްފައެވެ.

އޭގެ ތެރޭގައި، ގުރޭޑް 8 ގައި ކިޔަވާ ދަރިވަރުންގެ ކިޔެވުން ފުރިހަމަ ނުކުރެވޭކަމާއި، ފައުންޑޭޝަން ސްޓޭޖާއި ކީސްޓޭޖް 1 ގެ ދަރިވަރުންނަށް ލިޓްރަސީ، ނިއުމަރަސީ ހުނަރުތަކާއި ކިޔެވުމަށް ބޭނުންވާ ތަފާތު ގިނަ ހުނަރުތައް ލިބުމުގެ ފުރުޞަތު ގެއްލޭ ކަމާއި، އުނގެނުމުގައި ދަތިކަން ހުންނަ ދަރިވަރުންނަށް ދަތިތަކާއި ކުރިމަތިވާ ކަމާއި، ދިރާސީ އަހަރަށް ގެނެވިފައިވާ ބަދަލުގެ ސަބަބުން ދަރިވަރުންނާއި ބެލެނިވެރިންނާއި އަދި މުދައްރިސުންގެ ނަފްސާނީ ދުޅަހެޔޮކަމަށާއި ދޭދޭ ގުޅުންތަކަށް ކުރާނެ ނޭދެވޭ އަސަރުތައް އިތުރުވުމާއި އަދި ދަރިވަރުންގެ ނަފްސާނީ ދުޅަހެޔޮކަމަށް ނޭދެވޭ އަސަރުކުރާނެކަން ހިމެނެއެވެ. 

ދިރާސީ އަހަރު ފެށުން އަލުންޖެނުއަރީމަހަށް ބަދަލުކުރުމަށްޓަކައި، ސަރުކާރުން ވަނީ ދިރާސީ އަހަރުގެ ކަލަންޑަރަށް ބަދަލުތައް ގެނެސް ޓާމުތައް ކުރުކޮށްފައެވެ. 

ދިރާސީ އަހަރު ފެށުން އޮގަސްޓް މަހަށް ބަދަލުކުރީ ކޯވިޑާއި ގުޅިގެން ދިމާވި ދަތިތަކާއި އަދި ޖޫން ޖުލައިއަށް ސްކޫލު ބޮޑުޗުއްޓީ ބަދަލުކުރުމަށްޓަކައި 2020 ވަނަ އަހަރުގައެވެ. 

ދިރާސީ އަހަރުގެ ކަލަންޑަރު ކުރިން އޮތް ގޮތަށް ބަދަލުކުރެއްވުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ.