ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތައް ދޫކުރުމުގެ މަސައްކަތް އަލުން ފަށާނީ، ފްލެޓްތަކާއި ގުޅޭ މައްސަލަތައް އޭސީސީން ބަލައި ނިމުމުން ކަމުގައި ހައުސިންގ މިނިސްޓްރީން ވިދާޅުވެއްޖެއެވެ.

އެމިނިސްޓްރީން ނެރެފައިވާ ނޫސްބަޔާނުގައި ވިދާޅުވެފައި ވަނީ، މާލެ ސަރަހައްދުން ފްލެޓްތައް ދޫކުރުމަށް ސަރުކާރުން ހިންގާ "ގެދޮރުވެރިޔާ ސްކީމް"ގެ ދަށުން، ފްލެޓަށް އަދި ހުށައަޅާފައިވާ ފަރާތްތަކުގެ ތެރެއިން ދާއިމީ ލިސްޓުގައި ހިމެނޭ ފަރާތްތަކަށް ފްލެޓްތައް ހަވާލުކުރުމުގެ މަސައްކަތް މިއަދު ފަށާނެކަމަށް މިނިސްޓްރީން ވިދާޅުވެފައި ނުވާނެ ކަމަށެވެ. އަދި އެފަދަ ވާހަކައެއް ހައުސިންގ މިނިސްޓަރ ޑރ. ޢަލީ ޙައިދަރުވެސް ވިދާޅުވެފައި ނުވާކަމުގައި އެމިނިސްޓްރީން ވިދާޅުވިއެވެ.

މީގެ އިތުރުން އެމިނިސްޓްރީން ވިދާޅުވީ، ފްލެޓް ހަވާލުކުރުމުގެ މަސައްކަތް ކުރިއަށް ނުގެންގޮސް ހުއްޓާލާފައި ވަނީ އެންޓި ކޮރަޕްޝަން ކޮމިޝަން (އޭ.ސީ.ސީ)އިން މިސްކީމާއި ގުޅޭ މަސައްކަތް ހުއްޓާލުމަށް އެމިނިސްޓްރީއަށް އަންގާފައިވާތީ ކަމަށެވެ. އަދި އެކަމާގުޅޭ މަސައްކަތްތައް އަލުން ފަށާނީ އޭސީސީން އެމައްސަލަބަލައި އެމިނިސްޓްރީއަށް ފޮނުއްވުމުން ކަމުގައިވެސް ހައުސިންގ މިނިސްޓްރީން ވަނީ ވިދާޅުވެފައެވެ.

ފްލެޓްތައް ހަވާލުކުރުމުގެ މަސައްކަތާއި ގުޅޭ ގޮތުން ހައުސިންގ މިނިސްޓްރީން މިގޮތަށް ވިދާޅުވެފައި ވާއިރު، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިޖެނުއަރީ މަހުގެ 2 ވަނަ ދުވަހު ވިދާޅުވީ، ގޯތި އަދި ފްލެޓް ލިބޭނެ ކަމަށް ފައިނަލް ލިސްޓުގައި ހިމެނި ގެޒެޓްކޮށްފައިވާ ފަރާތްތަކަށް ރެޖިސްޓްރީ ހަދައިދީ ގޯތި/ފްލެޓް ހަވާލުކުރުމަކީ އެމަނިކުފާނު ވަޢުދުވީ ގޮތަށް ކުރިޔަށްދާނެ ކަމެއް ކަމަށެވެ.

ގެދޮރުވެރިޔާ ފްލެޓްތައް ދޫކުރުމުގައި، މިސަރުކާރުން އަމަލުކުރަމުން އަންނަ ގޮތާއި މެދު ފްލެޓްތައް ލިބިފައިވާ ފަރާތްތަކުން އަންނަނީ ހިތްހަަމަ ނުޖެހުންތައް ފާޅުކުރަމުންނެވެ.