ގައުމީ ވޮލީބޯޅަ މުބާރާތުގެ ޗެމްޕިއަންކަން ދިވެހި ސިފައިންގެ ކްލަބުން ހޯދައިފިއެވެ. ދިވެހި ސިފައިންގެ ކްލަބުން މުބާރާތް ކާމިޔާބުކުރީ، ފައިނަލުގައި 3-1 ސެޓުން ކްލަބް އާބަންކޯ ބަލިކޮށްގެންނެވެ.

ސޯޝަލް ސެންޓަރުގެ އެތެރޭ ކޯޓުގައި ރޭ ކުޅުނު މި މެޗުގައި ސިފައިންގެ ކްލަބުން ސެޓުތައް ކާމިޔާބުކޮށްފައިވަނީ 25-22، 26-24 އަދި 25-20 އިންނެވެ. އާބަންކޯއަށް ކާމިޔާބު ކުރެވުނީ މެޗުގެ ދެވަނަ ސެޓެވެ. އެއީ 25-23 އިންނެވެ. މި ސެޓުގައި އާބަންކޯގެ ތަފާތަކަށްވީ ބިދޭސީ ދެ ކުޅުންތެރިން އަދި އިސްމާއިލް ސާޖިދު (ކުޑަކާއްޓޭ) ފޯމުގައި ހުރުމެވެ.

ވާދަވެރިކޮށް ފެނިގެން ދިޔަ މެޗުގެ ތިން ވަނަ ސެޓުގައި އާބަންކޯގެ ކުޅުންތެރިއަކަށް ރަތްކާޑު ވެސް ދައްކާފައިވެއެވެ. އެ ސެޓު ސިފައިން ކޮޅަށް އެނބުރުނީ އެ ހިސާބުންނެވެ.

މުބާރާތުގެ އެންމެ މޮޅު ކުޅުންތެރިއަކަށް ހޮވިފައިވަނީ ދިވެހި ސިފައިންގެ ކްލަބުގެ ހުސެއިން ރަޒާންއެވެ.

ސިފައިންގެ ކްލަބު އެންމެ ފަހުން މި މުބާރާތް ކާމިޔާބުކޮށްފައި ވަނީ 2019 ވަނަ އަހަރުއެވެ. އަދި މި މުބާރާތުގެ އެންމެ ފަހުގެ ޗެމްޕިއަނުންނަކީ ސްޕޯޓްސް ކްލަބް ސިޓީއެވެ.

އަދި މިއީ ސިފައިންގެ ކްލަބުން 4 ދުވަސް ތެރޭގައި ކާމިޔާބުކުރި ދެވަނަ ތައްޓެވެ. އެންމެ ފަހުން އެ ކްލަބުން ކާމމިޔާބުކޮށްފައިވަނީ ގައުމީ ވޮލީ ލީގެވެ. އެ ކުލަބުން ލީގު ހާސިލްކުރީ، ލީގުގެ ފަހު މެޗުން ސީދާ 3 ސެޓުން ޕޮލިސް ކްލަބް ބަލިކުރުމަށްފަހުއެވެ.