ސްޓެލްކޯގެ ބޭނުމަށް 2010 ވަނަ އަހަރުންފެށިގެން ބަންދުކޮށްފައި އޮތް ދޮން އަނދަރާދަ ހިނގުން ހުޅުވާލުމުގެ މަސައްކަތަކީ ބުރަ އަދި ގޮންޖެހުން ބޮޑު މަސައްކަތެއް ކަމުގައި ސްޓެލްކޯއިން ބުނެފިއެވެ.

ސްޓެލްކޯއިން މިއަދު ވަނީ، ދޮޮންއަނދަރާދަ މަގު ހުޅުވާލުމަށް އެކުންފުނިން ކުރަމުންދާ މަސައްކަތްތައް ނޫސްވެރިންނަށް ދައްކާލާފައެވެ.

ނޫސްވެރިންނާއި ބައްދަލުކުރައްވައި ވާހަކަފުޅު ދައްކަވަމުން، ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަހުމީ ވިދާޅުވީ، ކުރިން ސްޓެލްކޯއިން ނިންމީ މިމަހުގެ 15ގައި އެމަގު ހުޅުވާލުމަށް ނަމަވެސް އެމަގު ހުޅުވާލުމަށް ކުރަންޖެހިފައި ވަނީ ވަރަށް ބުރަ މަސައްކަތްތަކެއް ކަމަށެވެ. މިގޮތުން އެމަގު ބަންދުކޮށް އެސަރަހައްދު ސްޓެލްކޯއިން ބޭނުންކުރި އިރު، މަގަށްވާގޮތަށް އަޅާފައިވާ އިމާރާތްތައް ރޫޅައި ނެގުމުގެ މަސައްކަތުގައި، ކުރިމަތިވި އެންމެ ބޮޑު ޖެހުމަކީ އިންޖީނުތައް ބެހެއްޓުމަށް ހަދާފައިވާ ކޮންކްރީޓް ބެޑްތައް ތަޅާލައި ނެގުން ކަމުގައި އޭނާ ވިދާޅުވިއެވެ. 

އިންޖީނުތައް ބެހެއްޓުމަށް ހަދާފައިވާ ބެޑުތައް ތަޅާލާފައި ނަގަނީ --

ފަހުމީ ވިދާޅުވީ، އިންޖީނުތައް ބެހެއްޓުމަށް އަޅާފައިވާ ކޮންކްރީޓް ބެޑްތައް ހުރީ މަގުގެ ސަރަހައްދުގައި ކަމަށް ވާއިރު، އެބެޑްތައް ހަދާފައި ހުރީ، 6 ފޫޓު ބޯކޮށްއަޅާފައިވާ ވަރަށް ވަރުގަދަ ކޮންކްރީޓުން ކަމަށެވެ. އެ ކޮންކްރީޓްތައް ތަޅައި ނެގުމަށް ތިންފަރާތަކާއި ހަވާލުކޮށް އެފަރާތްތަކަށްވެސް އެކަން ނުކުރެވިގެން މިހާރު އެމަސައްކަތް ކުރަމުން ދަނީ، އެމްޓީސީސީއާ ހަވާލުކޮށްގެން ކަމުގައިވެސް ފަހުމީ ވިދާޅުވިއެވެ.

ސްޓެލްކޯއިން މިހާރު ލަފާކޮށްފައި ވަނީ، ދޮން އަނދަރާދަމަގަށް އަރާގޮތަށް ހުރި ޢިމާރާތްތަކާއި، އިންޖީނުތައް ބެހެއްޓުމަށް އަޅާފައިވާ ބެޑްތައް ނަގައި އަލުން އެމަގު ހަދައި ހުޅުވައިލެވޭނީ ޖެނުއަރީ ނިމޭހައި ތަނަށް ކަމަށެވެ. 

ދޮންއަނދަރާދަ މަގު --

ދޮން އަނދަރާދަ މަގަކީ، އަމީނީ މަގުން، ބޮޑުތަކުރުފާނު މަގަށް ނުކުމެވޭ ގޮތަށް އޮތް މަގަކަށްވުމާއި އެކު އެމަގު ހުޅުވާލެވުމުން އެސަރަހައްދުގެ ޓްރެފިކް ތޮއްޖެހުމުގެ މައްސަލަތަކަށް ލުއިތަކެއް ލިބިގެންދާނެއެވެ. އެމަގު އަލުން ހުޅުވާލުމުން ސްޓެލްކޯގެ ދެކޮށި ގުޅާލާނީ މަތިން ބުރިޖެއް އަޅައިގެން ކަމުގައިވެސް ސްޓެލްކޯއިން ވަނީ ބުނެފައެވެ.