Advertisement
ސިފައިން ފެން ހިންދުމުގެ މަސައްކަތުގައި ---
ބޯކޮށް ވާރޭވެހި މިއަދު ފެންބޮޑުވި ނަމަވެސް ގެއްލުން ލިބުނު ކަމުގެ ރިޕޯޓެއް ނެތް
މިއަދުވެސް މާލެއަށް ބޯކޮށް ވާރޭވެހި ފެން ބޮޑުވި ނަމަވެސް އެއްވެސް ގެއަކަށް ފެންވަދެ ގެއްލުމެއް ލިބުނުކަމުގެ ރިޕޯޓެއް ކޮށްފައިނުވާކަމުަގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވެއްޖެއެވެ.
އެއޮތޯރިޓީ ވިދާޅުވީ، ފެންބޮޑުވުމާއި ގުޅިގެން ވެލިބަސްތާ ޖެހުމަށް އެހީތެރިކަމަށް ބައެއް ފަރާތްތަކުން އެދުނު ކަމަށާއި، ސިފައިން މާލޭގެ ބައެއް ސަރަހައްދުތަކުގައި ވެލިބަސްތާ ޖެހުމުގެ މަސައްކަތް ކޮށްފައިވާ ކަމަށެވެ.
މިއަދު މެންދުރުފަހުން ފެށިގެން މާލެއަށް ބޯކޮށް ވާރޭވެހި މަގުތަކުގައި ފެންބޮޑުވާން ފެށުމާއި ގުޅިގެން އެމްއެންޑީއެފުން ވަނީ މަގުތަކުން ފެންހިންދުމުގެ މަސައްކަތާއި، ވެލިބަސްތާ ޖެހުމުގެ މަސައްކަތްކޮށްފައެވެ. އަދި މިހާރު މާލޭގެ އެކި ސަރަހައްދުތަކުން ފެންގަނޑުތައް ހިންދާލެވިފައިވާ ކަމުގައިވެސް އެމްއެންޑީއެފުން ވަނީ ބުނެފައެވެ.
ރާއްޖޭގެ އިރުމަތިން އިންޑިއާކަނޑުގައި އުފެދިފައިވާ ކޮޅިގަނޑެއް ރާއްޖެ ހުރަސްކޮށް އަރަބިކަނޑަށް ދަތުރުކުރަމުންދާތީ، މި ތިންދުވަހުވެސް ރާއްޖެއަށް މޫސުމް ގޯސްވާނެ ކަމުގައި މޫސުމާއި ބެހޭ ޤައުމީ އިދާރާއިން ވަނީ ބުނެފައެވެ.
ހުސްވި ޑިސެމްބަރު މަހުގެ 31 ވަނަ ދުވަހު މާލެއަށް ވަރަށް ބޯކޮށް ވާރޭ ވެހުމުގެ ސަބަބުން ފެންބޮޑުވެ ބައެއް ގޭގެއަށް ފެންވަދެ މީހުން ވަގުތީ ހިޔާވަހިކަމަށްވެސް ބަދަލުކުރަން ޖެހުނެވެ.
