އިޤުތިޞާދާއި ވިޔަފާރީގެ ދާއިރާ، އަދި ސިއްޙީ ދާއިރާ އާއި ޢުމުރާނީ ތަރައްޤީގެ މަޝްރޫޢުތައް ހިމެނޭހެން ދިވެހިރާއްޖެއާ ޗައިނާގެ މެދުގައި ތަފާތު 20 އެއްބަސްވުމެއްގައި މިއަދު ސޮއެކޮށްފިއެވެ.

މި އެއްބަސްވުންތަކުގައި ސޮއިކުރުމަށް މިއަދު ޗައިނާގެ ބެއިޖިންގގެ ގްރޭޓް ހޯލް އޮފް ޕީޕަލްގައި ބޭއްވި މި ރަސްމިއްޔާތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި ޗައިނާގެ ރައީސް ޝީ ޖިންޕިން ބައިވެރިވެވަޑައިގެންނެވިއެވެ. އެއްބަސްވުންތަކުގައި ސޮއެކުރުމުގެ ރަސްމިއްޔާތު ބާއްވާފައި ވަނީ، ދެޤައުމުގެ އިސްވެރިންގެ މެދުގައި ބޭއްވި ރަސްމީ ވާހަކަފުޅުތަކަށް ފަހުގައެވެ.

މިއަދު ދިވެހި ރާއްޖެއާ ޗައިނާއިން ސޮއިކުރި އެއްބަސްވުންތަކުގެ ތެރޭގައި، ކާރިސީ ހީރާސް ކުޑަކުރުމަށް މަސައްކަތް ކުރުމާއި ގުޅޭ އެއްބަސްވުމަކާއި، ނޫ އިޤުތިޞާދެއް ބިނާކުރުމާއި ގުޅޭ އެއްބަސްވުމަކާއި، ޑިޖިޓަލް އިކޮނޮމީ ބިނާކުރުމާއި ގުޅޭ އެއްބަސްވުމަކާއި، އިންވެސްޓްމެންޓްތައް އިތުރު ކުރުމާއި ގުޅޭ އެއްބަސްވުމަކާއި، ދެޤައުމުގެ ސަރުކާރުގެ މީޑިއާތަކުގެ މެދުގައި ގުޅުން ބަދަހިކުރުމާއި ގުޅޭ އެއްބަސްވުމެއް ހިމެނެއެވެ. މީގެ އިތުރުން، ވިޔަފާރީގެ މަގު ބިނާކުރުމުގައި ދެޤައުމުން ބައިވެރިވުމާއި ގުޅޭ އެއްބަސްވުމަކާއި، ޑިޖިޓަލް އިކޮނޮމީ ބިނާކުރުމުގައި ދެޤައުމުން ގުޅިގެން މަސައްކަތް ކުރުމާއި ގުޅޭ އެއްބަސްވުމަކާއި، އެއްޤައުމުން އަނެއް ޤައުމަށް ޖަނަވާރާއި އެހެނިހެން ދިރޭތަކެތި ގެންދިއުމާއި ގުޅޭ އެއްބަސްވުމަކާއި، ދެޤައުމުގެ މެދުގައި އިސްތިރާޖީ ގުޅުންތައް ވަރުގަދަކުރުމާއި ގުޅޭ އެއްބަސްވުމަކާއި، އިއާދަކުރަނިވި ހަކަތައާއި ގުޅޭ އެއްބަސްވުމެއް ހިމެނެއެވެ. އަދި މީގެ އިތުރުން، ފުށި ދިއްގަރު ފަޅުގައި ސޯޝަލް ހައުސިންގ ޕްރޮޖެކްޓާއި، ވެލާނާ އިންޓަރނޭޝަނަލް އެއާޕޯޓު ތަރައްޤީކުރުމުގެ ޕްރެޖެކްޓާއި، މަސްބަންދުކުރާ ކާރުޚާނާއެއް އެޅުމާއި، މާލެ އާއި ވިލިމާލޭގެ މަގުތައް ހެދުމާއި ގުޅޭ އެއްބަސްވުމެއްގެ އިތުރުން، ފަތުރުވެރިކަމުގެ ދާއިރާ ކުރިއެރުވުމާއި ގުޅޭ އެއްބަސްވުމެއްވެސް ހިމެނެއެވެ.

އަދި މީގެ އިތުރުން ރާއްޖޭގެ ރުއްތަކަށް މަޑީގެ ސަބަބުން ލިބޭ ގެއްލުންތަކުން ރައްކާތެރިކުރުމަށް މަސައްކަތް ކުރުމާއި ގުޅޭ އެއްބަސްވުމަކަށާއި، ރާއްޖޭގެ އަތޮޅުތަކުގެ ސިއްޙީ މަރުކަޒުތަކުގެ ލެބޯޓްރީތައް ތަރައްޤީކުރުމާއި ގުޅޭ އެއްބަސްވުމެއްގައިވެސް މިއަދު ވަނީ ސޮއެކުރައްވާފައެވެ.

ދިވެހިރާއްޖޭގެ ތަރައްޤީއަށް ބޭނުންވާ ގިނަ މަޝްރޫޢުތަކެއް ހިންގުމަށް ޗައިނާ ސަރުކާރާއިއެކު ދިވެހިރާއްޖެއިން އެއްބަސްވުންތަކުގައި މިއަދު ސޮއެކޮށްފައިވާއިރު، މީގެ ކުރިންވެސް ރާއްޖޭގެ އިޤުތިޞާދީ އަދި ޢުމުރާނީ ތަރައްޤީއަށް ޗައިނާ ސަރުކާރުން ބޮޑެތި އަދި ގިނަ އެހީތަކެއް ވެދެއްވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފާހަގަކުރައްވާފައެވެ.