މާލޭ ސިޓީގެ މޭޔަރަކަށް އިންތިޚާބު ވުމަށް ފަހުގައި، މަސައްކަތް ކުރައްވާނީ ރައްޔިތުންނާއި ވަރަށް ގާތުން ކަމަށާއި، ރައްޔިތުންނަށް ފެންނާނެ މީހަކަށް ވެވަޑައިގަންނަވާނެ ކަމުގައި މާލޭ ސިޓީގެ މޭޔަރުކަމުގެ މަޤާމަށް ވާދަކުރައްވާ އާދަމް އާޒިމް ވިދާޅުވެއްޖެއެވެ.

"ނޫން" ގެ ޚާދިމް ޕްރޮގްރާމްގައި ވާހަކަފުޅު ދައްކަވަމުން އާޒިމް ވިދާޅުވީ، ރައްޔިތުންނަށް އޭނާ ފެންނާނެ ކަމަށާއި ބައްދަލުވާނެކަމަށާއި މަސައްކަތްކުރައްވާނީ ރައްޔިތުންނާއި އެކުގައި ކަމަށެވެ. އަދި ކޮންމެ އަހަރަކުވެސް މަދުވެގެން ހަތަރު ފަހަރު ރައްޔިތުންނާއި އެކު ޓައުންހޯލް ބައްދަލުވުންތައް ބާއްވާނެ ކަމުގައިވެސް އާޒިމް ވިދާޅުވިއެވެ. މިގޮތުން ޓައުންހޯލް ބައްދަލުވުންތައް، ހުޅުމާލެ އާއި ވިލިގިލީގެ ރައްޔިތުންނަށް ވަކިން ބާއްވައި ދެއްވާނެ ކަމުަގައިވެސް އާޒިމް ވިދާޅުވިއެވެ.

އާޒިމް ވިދާޅުވީ، މިހާތަނަށްވެސް ކުރެއްވި ހުރިހާ މަސައްކަތެއްގައި މާތްﷲ ގެ ވާގިފުޅާއިއެކު ކާމިޔާބު ހޯދުނު ކަމަށެވެ. އެހެންކަމުން މިފަހަރު އިންތިޚާބަށް ނުކުމެވަޑައިގެންނެވީ ކާމިޔާބު ހޯދޭނެކަމުގެ ޔަޤީންކަމާއި އެކުގައި ކަމަށްވެސް އާޒިމް ވިދާޅުވިއެވެ. އާޒިމް ވިދާޅުވީ، މިހާތަނަށް ހަވާލުވި ކޮންމެ ތަނަކުންވެސް ވަކިވެވަޑައިގެންނެވީ އެތަނަކީ، ފައިދާވާ އަދި ހަރުދަނާ ތަނަކަށް ހައްދަވައި ދެއްވުމަށް ފަހުގައި ކަމަށެވެ. އަދި ބޭނުންވަނީ، މާލެއަކީ މީހުން ދިރިއުޅޭ ހިތްވާ ތަނަކަށް ހަދައިދިނުންކަމުގައި އާޒިމް ވިދާޅުވިއެވެ.