އިންޑިއާއަށް ނިސްބަތްވާ ހެކަރުންގެ ގުރޫޕަކުން ރާއްޖޭގެ ޖުވެނައިލްކޯޓުގެ ވެބްސައިޓް ހެކްކޮށްފިއެވެ.

އެވެބްސައިޓް ހެކްކޮށް ވެބްސައިޓްގެ ފްރޮންޓް ޕޭޖަށް މިހާރު އަރުވާފައި ހުރީ އިންޑިއާގެ ދިދަ އާއި ހެކަރުންގެ ގުރޫޕުން ދިވެހިރާއްޖެއަށާއި ދިވެހި ސަރުކާރަށް ދީފައިވާ އިންޒާރުގެ މެސެޖެކެވެ. އެމެސެޖުގައި ބުނެފައި ވަނީ، ވެބްސައިޓް ހެކްކޮށްފައި ވަނީ، ޓީމް ނެޓްވޯކް9 ނަމަކަށް ކިޔާ ގުރޫޕަކުން ކަމަށެވެ.

އަދި އެއީ އިންޑިއާގެ ބޮޑުވަޒީރަށާއި އިންޑިއާގެ ރައްޔިތުންނަށް ދިވެހި ސަރުކާރުގެ ނައިބު ވަޒީރުންގެ ގޮތުގައި ތިބި ތިން ބޭފުޅުން ކުރި ފުރައްސާރައިގެ ބަދަލުހިފުމެއް ކަމަށްވެސް ވަނީ ބުނެފައެވެ.

މިޖެނުއަރީ މަހުގެ 4 ވަނަ ދުވަހާއި 5 ވަނަ ދުވަހު އިންޑިއާގެ ބޮޑުވަޒީރު ނަރެންދުރަ މޯދީ، އިންޑިއާގެ ބެލުމުގެ ދަށުގައި އޮންނަ ލަކްޝަދީބުގެ ރަށްތަކަށް ޒިޔާރަތްކުރައްވައި ސޯޝަލްމީޑިއާގައި ފެތުރި ޕޯސްޓްތަކަށް، ޔޫތު މިނިސްޓްރީގެ ޑެޕިއުޓީ މިނިސްޓަރުންގެ މަޤާމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢައްޔަނުކުރައްވާފައިވާ ތިންބޭފުޅަކު ކުރެއްވި ބޭއަދަބީ ކޮމެންޓްތަކާއި ގުޅިގެން އިންޑިއާ އާއި ދިވެހިރާއްޖޭގެ ގުޅުން ވަނީ ވަރަށް ބޮޑަށް ގޯސްވެފައެވެ. އަދި ރާއްޖޭގެ ޓޫރިޒަމް ބޮއިކޮޓް ކުރުމަށް ގޮވާލުމުގެ އިތުރުން އިންޑިއާގެ ހެކަރުން ދަނީ، ސަރުކާރުގެ އިދާރާތަކާއި، ރިޒޯޓްތަކުގެ ވެބްސައިޓްތަކަށް ސައިބާ ހަމަލާތައް ދެމުންނެވެ.