އެއް ފެންވަރެއްގައި ނަވާރަ އަހަރު ވަންދެން ފުޓުބޯޅަ ކުޅުމަށްފަހު ނިމިދިޔަ 2023 ވަނަ އަހަރުގެ ފަހުކޮޅު ފުޓުބޯޅައިން ރިޓަޔާކުރި އަބްދުﷲ ހަނީފް (ބެންޖޯ)ގެ ކާމިޔާބީތަކުގެ ސިއްރަކީ އޭނާގެ "ޑިސިޕްލިން" ކަމާމެދު އެއްވެސް ޝައްކެއް ނެތެވެ. އުމުރުން މިހާރު 39 އަހަރުގެ ބެންޖޯ "ނޫން" އަށް ދިން ޙާއްސަ އިންޓަވިއުއެއްގައި ފާހަގަކުރި ގޮތުން، ދަނޑުމަތީގަ އާއި ދަނޑުން ބޭރުގައި އޭނާ އެންމެ އިސްކަންދޭ އެއް ކަމަކީ ކުޅުންތެރިއެއްގެ އަހުލާގު ހިފެހެއްޓުމެވެ. މިއީ މިހާރުގެ ކުޅިވަރު ކުޅުންތެރިން ބެންޖޯގެ ކެރިއަރުން ދަސްކުރަންވީ އެންމެ މުހިންމު އެއް ފިލާވަޅެވެ.

ރާއްޖޭގެ އެންމެ މަތީ ފަންތީގައި ފުޓުބޯޅަ ކުޅުމަށް އަޒުމު ކަނޑައަޅައި، މީގެ 24 އަހަރު ކުރިން، މީލާދީ ގޮތުން 2000 ވަނަ އަހަރުގެ ތެރޭގައި އޭނާ މާލެ ބަދަލުވީ ވެސް، އެ ރިވެތި ސިފަ ރަށުން ހިފައިގެނެވެ. މިއީ، ވަޒީފާ އަދާކުރަމުން ޕްރޮފެޝަނަލް ފުޓުބޯޅަ ކުޅުންޖެހިފައިވާ ދިވެހި ފުޓުބޯޅަ ކުޅުންތެރިންގެ ތެރެއިން މަދު ކުޅުންތެރިއެއްގެ ފުށުން މެނުވީ ނުފެންނަ، ނަމަވެސް ކުޅުންތެރިއެއްގެ ގައިގައި ހުރުން އެންމެ މުހިންމު އެއް ސިފައެވެ. އެހެންނޫންނަމަ، އަނިޔާތައް ގިނަވެ، ކުޅުމުން ފޯކަސް ގެއްލުމަކީ، ޓީމުން ބާކީވެ، ގިނަ ކުޅުންތެރިން އަވަހަށް ރިޓަޔާ ކުރުމަށް މެދުވެރިވާ ސަބަބެވެ. 

ދިވެހި ފުޓުބޯޅައިގެ ހުރިހާ ތައްޓެއް ހޯދި ބެންޖޯގެ ތަފާތަކީ އެއީއެވެ. އަބަދުވެސް ޑިސިޕްލިންއަށް އޭނާ އިސްކަންދިނެވެ. ވަޒީފާއަށް ދަމުން ނިދި ހަމަކުރުމާއި، ކެއުމުގެ ގަޑިތަކަށް ފަރުވާތެރިވިއެވެ. 

އައްޑޫއަށް އުފަން ބެންޖޯ މާލެ ބަދަލުވީ، ރާއްޖޭގައި އެންމެ އުހަށް ފުޓުބޯޅަ ކުޅެން ބޭނުންވެގެންނެވެ. އޭނާ ފާހަގަ ކުރި ގޮތުން، ކެރިއަރެއް ގޮތަށް ފުޓުބޯޅަ ކުޅެ، އެންމެ އުހަށް ދާން ބޭނުންނަމަ މާލެ ބަދަލުވުން އެއީ އޭރު ކޮންމެހެން ކުރަން ޖެހޭނެ ކަމެކެވެ. އަދި އޭނާ ވިސްނީ މާލެ ބަދަލުވެ، ހުނަރު އަވަހަށް ކުރިއެރުވުމަށް، ގިނައިން މެޗު އެކްސްޕީރިއެންސް ލިބޭނެ ޓީމަކަށް ކުޅުމަށެވެ. އޭރުގެ އެންމެ ވަރުގަދަ ކްލަބުތައް ކަމުގައިވާ އައިލެންޑް ފުޓްބޯލް ކްލަބް (އައިއެފްސީ) އާއި ކްލަބް ވެލެންސިއާ ފަދަ ކްލަބްތަކުން ލިބުނު ހުށަހެޅުންތަކަށް ފުރަގަސްދީ، ހުއްރިއްޔާ ސްޕޯޓްސް ކްލަބް (ހުރާ)އަށް ކުޅުމަށް އޭނާ ނިންމީ އެހެންވެއެވެ.

ބެންޖޯގެ ދިގު ފުޓުބޯޅަ ކެރިއަރުން އޭނާ އަބަދުވެސް އެންމެ ހަނދާނުގައި ހުންނަނީ ކްލަބް ޓީސީއާއެކު، ބަނގުލަދޭޝްގައި ކުޅުނު ޝެއިހް ކަމާލް އިންޓަނޭޝަނަލް މުބާރާތުގެ ކާމިޔާބީއެވެ. މި މުބާރާތަކީ ގިނަ ގޮތްގޮތުން ބެންޖޯ އާއި ޓީސީއަށް ހާއްސަ މުބާރާތެކެވެ. މި މުބާރާތުގެ ތަށި އުފުލާލައި، ދިވެހި ކްލަބަކުން އިންޓަނޭޝަނަލް މުބާރާތެއްގެ ތަށި ހޯދި ފުރަތަމަ ކްލަބުގެ ޝަރަފު ޓީސީއިން ހޯދިއިރު، މުބާރާތުގެ ފައިނަލް މެޗުގައި ބެންޗޯ ވަނީ ގޯލެއް ވެސް ކާމިޔާބުކޮށްފައެވެ. 

ޝެއިހް ކަމާލް އިންޓަނޭޝަނަލް މުބާރާތުގެ ވާހަކަތައް ހިއްސާ ކުރަމުން ބެންޖޯ ބުނީ، މި މުބާރާތުގެ ތައްޓަކީ ޓީސީގެ ތައްޓެއް ކަމަށް މުބާރާތަށް ފުރުމުގެ ކުރިން އެ ޓީމުގެ ކޯޗު މުޙައްމަދު ނިޒާމް (ނިޒާމްބެ) ބުނި ހިސާބުން އާންމުންގެ ތެރެއިން ވަރަށް ގިނަ ބަޔަކު އެއީ ނުވާނެކަމެއްކަމަށް ބުނިކަމަށެވެ. އަދި މުޅި ޓީމު ހިތްވަރު ހޯދީ އެފަދަ ނެގެޓިމް ކޮމެޓުތަކަށް ޕޮޒިޓިވްކޮށް ވިސްނައިގެންކަމަށް އޭނާ ކިޔައިދިނެވެ. 

ރާއްޖޭގެ ފުޓުބޯޅައިގެ މިސްރާބު މިހާރު ހުރިގޮތާ ގުޅޭ ގޮތުން ކުރި ސުވާލުގެ ޖަވާބުގައި ބެންޖޯ ބުނީ، ފުޓުބޯޅައިގެ ކުރިމަގު މި ވަގުތު ފެންނަނީ ބަނަކޮށް ކަމަށާއި، މި ކަމުގައި މިހާރު އެއްވެސް ތަރުތީބެއް ނެތް ކަމަށެވެ. އަދި މިކަން ރަގަޅު ކުރުމަށް ގިނަ މަސައްކަތްތަކެއް ކުރަންޖެހޭ ކަމަށް އޭނާ ފާހަގަ ކުރިއެވެ. 

ފުޓުބޯޅަ ރަގަޅު ކުރުމަށް ދެން ކުރަން އޮތް އެންމެ މުހިންމު ކަމަކީ ފުޓުބޯޅަ ކުޅުންތެރިންނަށް އިތުރު ފުރުސަތު ހޯދައިދިނުންކަމަށް ބެންޖޯ ފާހަގަކުރިއެވެ. އެގޮތުން ވާދަވެރި މެޗުތަކެއް ކުޅުންތެރިންނަށް ތަޖުރިބާ ކުރެވެން ޖެހޭނެ ކަމަށާއި، މިކަން ކުރުމުގައި ސަޕޯޓަރުންގެ ބައިވެރިވުން ގެންގުޅޭނެ ގޮތެއް ވެސް ހޯދަންޖެހޭނެ ކަމަށް އޭނާ ދެކެއެވެ.

ބެންޖޯގެ ދިގު ފުޓުބޯޅަ ކެރިއަރުގައި އޭނާއަކީ ލީޑަރެކެވެ. ގިނަ ޓީމުތަކެއްގެ ކެޕްޓަން ބޭންޑު އަޅައި، ދަނޑު ތެރެއިންނާއި، އަދި ޙާއްސަކޮށް ދަނޑުން ބޭރުން ކެޕްޓަނެއްގެ މަސްއޫލިއްޔަތު އަދާކުރަން ޖެހުނު މިންވަރު އިތުރުކަމަށް އޭނާ ހިއްސާ ކުރިއެވެ. ސަބަބަކީ ރާއްޖޭގެ ފުޓުބޯޅަ އޮތް ހާލަތެވެ. ކުޅުންތެރިންނަށް މުސާރަ ނުދެވުމުން، ފަރިތަކުރުންތަކަށް ނުނިކުންނަން ތިބި ކުޅުންތެރިން ކުޅެން ނެރުމަށް ކެޕްޓަނެއްގެ ހައިސިއްޔަތުން އޭނާ ގިނަ މަސައްކަތްތަކެއް ކުރިއެވެ. ހުރިހާ މިޒާޖެއްގެ ކުޅުންތެރިން ގޮވައިގެން އުޅެން ދަންނަ ކެޕްޓަނަކަށް އޭނާ ވިއެވެ. 

މިއަދު ފުޓުބޯޅަ ކުޅުމާ ދުރަށް ދިޔަ ނަމަވެސް، ބެންޖޯ މި ދިޔައީ މިއަދުގެ ކުޅުންތެރިންނަށް މުހިންމު ރޯލް މޮޑެލެއްގެ ގޮތުގައެވެ. ކުޅިވަރު ކުޅެގެން ލިބޭ އާމްދަނީއަށް ބަރޯސާ ނުވެވޭތީ ފުލް ޓައިމް ވަޒީފާ އަދާކުރިއެވެ. އަދި އެކަމުން ކުރިމަތިވި ހުރަސްތަކަށް ކެތްތެރިކަމާއެކު ކުރިމަތިލިއެވެ. ހިތުގައި އޮތީ އެންމެ އަޒުމެކެވެ. އެއީ މީގެ 24 އަހަރު ކުރިން އައްޑޫއިން ފުރިއިރުވެސް ހިތުގައި އޮތް އަޒުމެވެ. އެކަމަށް ބަދަލެއް ނާދެއެވެ.

ހަޔާތުގައި އޭނާގެ ވިސްނުން ދެންވެސް ހުރީ ވަރަށް އުހުގައެވެ. ފުޓުބޯޅަ ކުޅުން ޕްރޮފެޝަނަލްކޮށް ހުއްޓާލުމަށްފަހު، މިހާރުގެ އަޒުމަކީ ރައްޔިތުންގެ ޚާދިމަކަށްވެ އިހްލާސްތެރިކަމާއެކު ރައްޔިތުންނަށް ހިދުމަތްކުރުމެވެ. އަބަދުވެސް ސިޔާސީ މަސައްކަތްތަކުގައި ހަރަކާތްތެރިވި ބެންޖޯ، ރައްޔިތުންގެ މަޖިލީހުގެ އިންތިހާބުގައި ވާދަކުރާނީ އެމްޑީޕީގެ ޓިކެޓުގައި ފޭދޫ ދެކުނު ދާއިރާއަށެވެ.