އަމީނީ މަގުގެ އެންމެ ފަހުބައިގެ މަސައްކަތް ނިމި އާއްމު ދަތުރުފަތުރަށް އެމަގު ހޮނިހިރު ދުވަހު ހުޅުވާލާނޭ ކަމުގައ ކޮންސްޓްރަކްޝަން މިނިސްޓްރީން ވިދާޅުވެއްޖެއެވެ.

އެމިނިސްޓްރީން ވިދާޅުވީ، އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ތެރެއިން ސެގްމެންޓް 12 އަދި 13ގައި ތާރުއަޅައި ނިމިފައިވާ ކަމަށެވެ. އަދި އެމަގުގެ އިއްޒުއްދީން މަގާއި އަމީނީ މަގު ގުޅޭ ޖަންގްޝަނާއި، ކަނބާ އައިސާ ރަނި ހިނގުމާއި އަމީނީ މަގު ގުޅޭ ޖަންކްޝަން މާދަމާ ހެނދުނު 6:00 އިން ފެށިގެން އާއްމު ދަތުރުފަތުރަށް ހުޅުވާލާނެ ކަމަށެވެ.

އަދި މުޅި މަގު އެއްކޮށް ދަރުމަވަންތަ ހޮސްޕިޓަލްގެ ބަސް ހުއްޓިހާއި ހަމައަށް ހުޅުވާލުމަށް ހަމަޖެހިފައި ވަނީ، ހޮނިހިރު ދުވަހުގެ ހެނދުނު، 6:00 އިން ފެށިގެން ކަމުގައިވެސް އެމިނިސްޓްރީން ވަނީ  ވިދާޅުވެފައެވެ.

އަމީނީ މަގުގެ ނުނިމިއޮތް ބައިގެ ޢަމަލީ މަސައްކަތް ރޯޑް ކޯޕަރޭޝަނުން ފަށާފައި ވަނީ، އެމްޑީޕީގެ ސަރުކާރު ބަދަލުވުމުން މަސައްކަތް ހުއްޓާލާފައި އޮތުމަށްފަހުގައި 9 ޑިސެންބަރު 2023 ގައެވެ.

މުޅި އަމީނީ މަގު، 13 ސެގްމެންޓަކަށް ބަހާލައިގެން، ތާރު އަޅައިގެން ޒަމާނީ ފެންވަރަށް ތަރައްޤީކުރުމަށް ސަރުކާރުގެ ބަޖެޓުން ވަނީ 84 މިލިޔަން ރުފިޔާ ޚަރަދުކޮށްފައެވެ.