ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު މިހާރު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި މިރޭ ޗައިނާގެ ވެރިރަށް ބެއިޖިންގއަށް ވަޑައިގެންފިއެވެ.

ވެރިރަށް ބެއިޖިންގއަށް ރައީސުލްޖުމްހޫރިއްޔާގެ ދެކަނބަލުން ވަޑައިގެންނެވުމުން، ރައިސުލްޖުމްހޫރިއްޔާގެ ދެކަނބަލުންނަށް ޗައިނާ ސަރުކާރުގެ އިސްވެރިންގެ ފަރާތުން ވަނީ ހޫނު މަރުޙަބާއެއް ދަންނަވާފައެވެ.

އާދިއްތަ ދުވަހުގެރޭ ރައީސުލްޖުމްހޫރިއްޔާ ޗައިނާއަށް ފެއްޓެވި ފުރަމާނަ ދަތުރުފުޅުގައި އެންމެ ފުރަތަަމަ ވަޑައިގެންނެވީ، ޗައިނާގެ ފޫޖިއާން ޕްރޮވިންސަށެވެ. މިގޮތުން ރައީސުލްޖުމްހޫރިއްޔާގެ ދެކަނބަލުން ވަނީ، އެ ޕްރޮވިންސްގެ މުހިއްމުތަންތަނަށް ޒިޔާރަތް ކުރައްވާފައެވެ. މިގޮތުން، ފޫޖިއާން ޕްރޮވިންސްގެ ޝިއަމެން ފްރީޓްރޭޑް ޒޯނަށާއި، އެޕްރޮވިންސްގެ ދާރުލް އާސާރަށާއި، ހޮންގ ކޮންގ ފިޝަރީ ކޯޕަރޭޝަނަށް ވަނީ ޒިޔާރަތް ކުރައްވާފައެވެ.

ރައީސުލްޖުމްހޫރިއްޔާ ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅަކީ، އެޤައުމުގެ ރައީސް ޝީ ޖިންޕިންގެ ދައުވަތަކަށް ކުރައްވާ ރަސްމީ ދަތުރުފުޅެކެވެ. މިދަތުރުފުޅުގެ ތެރެއިން ދެޤައުމުގެ މެދުގައި ބޭއްވޭ ރަސްމީ މަޝްވަރާތައް އޮންނާނީ ބެއިޖިންގައެވެ.