ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 17 ނޮވެމްބަރުގައި ވެރިކަމުގެ ހުވާކުރެއްވުމުގެ ކުރިން، ހުސްވި ޑިސެމްބަރު މަހު އިންޑިއާއަށް ދަތުރުފުޅެއް ކުރެއްވުމަށް ހުށައެޅުއްވި ކަމަށާއި އެދަތުރުފުޅު ލަސްވެގެން ދިޔައީ އިންޑިއާ ސަރުކާރުން އެކަމަށް އިޖާބަ ނުދީ އޮތުމުން ކަމުގައި ހާމަވެއްޖެއެވެ.

އިންޑިއާ އާއި ރާއްޖޭގެ ގުޅުންތައް ހީނަރުވެ މަޝްރަހް ހޫނުވެފައިވާ މިދަނޑިވަޅުގައި އިންޑިއާ ޓުޑޭގެ ނޫސްވެރިޔާ ގީތާ މޯހަން ވަނީ ރާއްޖެއައިސް ޚަބަރުތައް ގެނެސްދޭން ފަށާފައެވެ. އެކްސްގައި 77000 ވުރެ ގިނަ މީހުން ފޮލޯ ކުރާ ގީތާ މޯހަން އޭނާގެ އެކްސް އެކައުންޓުގައި މިއަދު ހެނދުނު ކުރި ޕޯސްޓްގައި ބުނެފައި ވަނީ އޭނާއަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި، ރައީސް ޑރ. މުޙައްމަދު މުޢިއްޒު ފުރަމާނަ ދަތުރުފުޅެއްގައި އިންޑިއާއަށް ވަޑައިގެންނެވުމަށް ހުށައެޅުއްވި ހުށައެޅުމާއި ގުޅޭ ގޮތުން މިހާތަނަށްވެސް އިންޑިއާއިން ތާރީޚެއް ދީފައި ނުވާތީ އެދަތުރުފުޅު ހަމަނުޖެހި އޮތީ ކަމުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފުރަތަމަ ފުރަމާނަ ދަތުރުފުޅުގައި ތުރުކިޔޭއަށް ވަޑައިގެންނެވިއިރު، ދެވަނަ ދަތުރުފުޅުގައި މިހާރު ވަޑައިގެން ހުންނެވީ، ޗައިނާގައެވެ. އިންޑިއާއަށް ވަޑަިއގެންނެވުމުގެ ކުރިން ރައީސް ޑރ. މުހައްމަދު މުޢިއްޒު ޗައިނާއަށް ވަޑައިގެންނެވުމުން، އިންޑިއާގެ ސިޔާސީ ބޭފުޅުންނާއި އަދި މީޑިއާތަކުންވެސް ވަނީ ދިވެހި ސަރުކާރަށް ފާޑުކިޔާފައެވެ.

ރައިސް ޑރ. މުޙައްމަދު މުޢިއްޒާއި މެދު އިންޑިއާ ސަރުކާރާއި ސިޔާސީ ފަރާތްތަކުގެ މެދުގައި އޮތް އެންމެ ބޮޑު ނުރުހުމަކީ، ވެރިކަން ހޯއްދެވުމަށް އެމަނިކުފާނުވެސް ބައިވެރިވެވަޑައިގެން "އިންޑިއާ އައުޓް" ކެމްޕޭން ހިންގަވާފައިވުމެވެ. އަދިި ވެރިކަމުގެ ފުރަތަމަ ދުވަހުގައި އެމަނިކުފާނު ވަނީ، ރާއްޖޭގައި ތިބި އިންޑިއާ ސިފައިން އަނބުރާ ގެންދިޔުމަށް އިންޑިއާ ސަރުކާރުގައި އެދިފައެވެ. 

ރާއްޖެއާ އިންޑިއާ އާއި ދެމެދު މިހާރު ގުޅުން ގޯސްވެގެން އުޅެނީ ސަރުކާރުގެ އިސް މަޤާމުތަކެއްގައި ތިއްބެވި ތިންބޭފުޅަކު އިންޑިއާ ސަރުކާރަށާއިމ ބޮޑުވަޒީރަށް އަދި އިންޑިއާގެ ރައްޔިތުންނަށް އެކްސްގައި ފުރައްސާރަ އާއި މަލާމާތްކޮށް ކުރި ޕޯސްޓްތަކާއި ގުޅިގެންނެވެ. އެއާއި ވިދިގެން އިނޑިއާގެ ސިޔާސީ ފަރާތްތަކުންނާއި، ސިޔާސީ އެކްޓިސްޓުން ދަނީ ރާއްޖެ ބޮއިކޮޓް ކުރުމުގެ ކެމްޕޭނެއް ހިންގަމުންނެވެ.