Advertisement
ފޮޓޯ: އިސްލާމިކް މިނިސްޓްރީ
ހައްޖާއި އުމްރާ ކޮންފަރެންސްގައި މިނިސްޓަރ ބައިވެރިވެވަޑައިގެންފި
ޙައްޖާއި އުމްރާގެ ޚިދުމަތުގެ މައުރަޒު އަދި ކޮންފަރެންސްގައި އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސަޢީދު ބައިވެރިވެވަޑައިގެންފިއެވެ. މިފަހަރުގެ ކޮންފަރެންސް ކުރިއަށްދަނީ މިމަހުގެ 11 ވަނަ ދުވަހުގެ ނިޔަލަށް ސައުދީ ޢަރަބިއްޔާގެ ޖިއްދާގައެވެ.
މިފަހަރުގެ ކޮންފަރެންސްގައި ހައްޖުވެރިންގެ ޚިދުމަތްތަކާ ބެހޭ ގޮތުން މަޝްވަރާތައް ކުރިއަށް ގެންދިޔުމަށްވަނީ ހަމަޖެހިފައެވެ. އަދި ހައްޖު ދަތުރުތަކުގެ ފެންވަރު ރަނގަޅުކޮށް ޒިޔާރަތްކުރާ މީހުންގެ ދީނީ އަދި ސަގާފީ ތަޖުރިބާތައް މުއްސަނދި ކުރުމުގެ ކަންކަންވެސް މި ކޮންފަރެންސްގައި ވަނީ ހިމަނާފައެވެ.
ޙައްޖު އެންޑް ޢުމްރާ ކޮންފަރެންސަކީ ޙައްޖާއި ޢުމްރާއާ ގުޅޭ ފާހަގަކޮށްލެވޭ ނިންމުންތައް ނިންމާ ފަރާތްތަކާއި، ތަޖުރިބާކާރުންނާއި، ޢިލްމުވެރިންނާއި، ދިރާސާވެރިންނާއެކު ސައިންޓިފިކް ސެޝަންތަކާއި، ވޯކްޝޮޕްތަކާއި، ތަމްރީނު ސެމިނާތައް ހިމެނޭ ގޮތަށް ބާއްވަމުން އަންނަ ބައިނަލްއަޤްވާމީ ކޮންފަރެންސެކެވެ.
މި ކޮންފަރެންސްގައި އިސްލާމިކް މިނިސްޓްރީގެ ނައިބު އަލީ އަޙްސަނާއި، އައްޝައިޚް އުސާމް މުޙައްމަދު ސަޢީދުގެ އިތުރުން މޯލްޑިވްސް ހައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލްވެސް ބައިވެރިވެޑައިގަންނަވާއެވެ.
އިސްލާމިކް މިނިސްޓަރ ޑރ. ޝަހީމް ސަޢުދީ ޢަރަބިއްޔާއަށް ކުރައްވާ ދަތުރުފުޅަކީ އެޤައުމުގެ ޙައްޖު މިނިސްޓަރު ޑރ. ތައުފީޤު ބިން ފައުޒާން އައްރަބީޢާގެ ދައުވަތަކަށް ކުރައްވާ ދަތުރުފުޅެކެވެ.
