ބިންވެރިޔާ ސްކީމްގެ ދަށުން ގޯތީގެ ރަޖިސްޓްރީ ޙަވާލުކޮށްފައިވާ ފަރާތްތަކަށް ބިން ކަނޑާ ޙަވާލުކުރުމުގެ މަސައްކަތް އަލުން ފަށައިފިއެވެ. ބިންވެރިޔާ ސްކީމްއަކީ މިދިޔަ ސަރުކާރުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ފައްޓަވާފައިވާ މަޝްރޫއެކެވެ. މިއީ މާލެ ރައްޔިތުންނަށް ޒަމާންތަކެއް ވަންދެން ދިމާވެފައިއޮތް ބޯހިޔާވަހިކަމުގެ މައްސަލައަށް ހައްލެއް ގެނެސްދެެއްވުމަށް ކުރިއަށްގެންދެވި މަަސައްކަތެކެވެ.

މިދިޔަ ސަރުކާރުން ވަނީ ބިންވެރިޔާ ސްކީމްގެ ދަށުން ބިން ލިބުނު ފަރާތްތަކަށް ގޯތީގެ ރަޖިސްޓްރީ ހަވާލުކޮށްފައެވެ. އަދި ބައެއް މީހުންނަށް ބިން ކަނޑާ ހަވާޅުކޮށްފައިވެެސްވެއެވެ. ނަމަވެސް އިންތިހާބާއި ދިމާކޮށް މި މަސައްކަތް ވަނީ ހުއްޓުވާފައެވެ. 

ނަމަވެސް ރަޖިސްޓްރީ ހަވާލުކޮށްފައިވާ މީހުންނަށް އަލުން ބިން ހަވާލުކުރުމުގެ މަސައްކަތް އިއްޔެ ވަނީ ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއިން ފަށާފައެވެ. އެގޮތުން އިއްޔެ ހުޅުމާލެ 2 ވަނަ ފިޔަވަހިން 18 ބިމެއް ވަނީ ހަވާލުކޮށްފައެވެ. 700 އަށްވުރެ ގިނަ މީހުންނަށް ގޯތީގެ ރަޖިސްޓްރީ ހަވާލުކޮށްފައިވާއިރު މީގެތެރެއިން މިދިޔަ ސަރުކާރުން 545 މީހަކަށް ވަނީ ބިން ހަވާލުކޮށްފައެވެ. މި މަސް ތެރޭގައި ބާކީތިބި މީހުންނަށް ބިން ހަވާލުކުރާނެކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއިން ވަނީ ބުނެފައެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށްޓަކައި ހިންގާ ބިންވެރިޔާ ސްކީމުގެ ދަށުން ގޯއްޗަށް ހުޅުވާލި ފުރުސަތުގައި ޝަރުޠު ހަމަވީ 19639 މީހުންނަށް ގޯތި ލިބުނެއެވެ. އެއީ 9001 ގޯއްޗެވެ.

އެގޮތުން ހުޅުމާލެއިން 1351 ގޯތި، ގުޅިފަޅުން 2218 ގޯތި އަދި ގިރާވަރު ފަޅުން 5432 ގޯއްޗެވެ. މި ގޯތި ތަކުގެ ތެރެއިން 1250 އަކަފޫޓާއި 1650 އަކަފޫޓާއި 2050 އަކަފޫޓުގެ ގޯތިތައް ދެއްވާނީ ހުޅުމާލެއާއި، ގުޅިފަޅާއި ގިރާވަރު ފަޅުންނެއެވެ. އަދި 2450 އަކަފޫޓުން ފެށިގެން 4000 އަކަފޫޓާ ދެމެދުގެ ގޯތިތައް ދޫކުރައްވާނީ ހުޅުމާލެއާއި ގުޅިފަޅުންނެވެ.