ޗައިނާ އާއިއެކު ދިވެހިރާއްޖެއިން ސޮއެކޮށްފައިވާ ފްރީޓްރޭޑް އެއްބަސްވުން ވަރަށް އަވަހަށް ތަންފީޒް ކުރައްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިހާރު އެމަނިކުފާނު، ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، "އިންވެސްޓް މޯލްޑިވްސް 2024" ފޯރަމްގައި ވާހަކަފުޅު ދައްކަވަމުންނެވެ.

ޗައިނާ އާއިއެކު ދިވެހިރާއްޖެއިން މިނިވަން ވިޔަފާރީގެ އެއްބަސްވުމެއް ޤާއިމްކުރީ ރައީސުލްޖުމްހޫރިއްޔާ ޢަބުދުﷲ ޔާމީންގެ ވެރިކަމުގައެވެ. އެ އެއްބަސްވުމާއި ގުޅޭ ގޮތުން އޭރު އެމަނިކުފާނު ވިދާޅުވީ،  ޗައިނާ ރާއްޖެ މިނިވަން ވިޔަފާރީގެ އެއްބަސްވުމުގަ ރާއްޖޭގެ 64 ދާއިރާއެއް ޗައިނާއަށް ހުޅުވާލިއިރު، 98 ދާއިރާއެއް ޗައިނާއިން ރާއްޖެއަށް ހުޅުވައިލާނެ ކަމަށެވެ. އެކަމުގެ ސަބަބުން ރާއްޖެއަށް އިޤުތިޞާދީ ގިނަ ފައިދާ ތަކެއް ލިބިގެންދާނެކަން ރައީސް ޔާމީނުގެ ރިޔާސީ ކެމްޕޭންގެ ތެރޭގައި އެމަނިކުފާނު ފާހަގަކުރައްވަމުން ގެންދެވިއެވެ.

ޗައިނާ މޯލްޑިވްސް ފްރީޓްރޭޑް އެގްރިމެންޓް ނިމިދިޔަ ސަރުކާރުން ތަންފީޒް ނުކުރީ އެ އެއްބަސްވުމުގެ ސަބަބުން ރާއްޖޭގެ އިޤުތިޞާދަށް ލިބިދާނެ ފައިދާއަށްވުރެ ބޮޑަށް ކުދި އަދި މެދުފަންތީގެ ވިޔަފާރިތަކަށް ލިބޭނެ ގެއްލުންތައް ބޮޑުކަމަށް ފާހަގަކޮށްފައެވެ.

"އިންވެސްޓް މޯލްޑިވްސް 2024" ފޯރަމްގައި ވާހަކަފުޅު ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ޗައިނާއަކީ ދިވެހިރާއްޖޭގެ ޢުމްރާނީ ތަރައްޤީގެ އެންމެ މުހިއްމު ބައިވެރިޔާކަމަށެވެ. އަދި އެމަނިކުފާނުގެ ޒަޢާމަތުގެ ފުރަތަމަ ފުރަމާނަ ދަތުރުފުޅުގައި ޗައިނާގެ ރައީސް ޝީ ޖިންޕިންގެ ދައުވަތަށް ޗައިނާއަށް ޒިޔާރަތްކުރުމަށް ފުރުޞަތު ލިބިވަޑައިގެންނެވުމަކީ، ޗައިނާގެ ވެރިންނާއި ރައްޔިތުން ދިވެހިރާއްޖެއާ ދިވެހިރާއްޖޭގެ ރައްޔިތުންނާއިއެކު ބަހައްޓަމުންދާ ގާތްގުޅުންތައް ހާމަވެގެންދާ ކަމެއްކަމުގައިވެސް ރައީސް ވިދާޅުވިއެވެ.

"އިންވެސްޓް މޯލްޑިވްސް 2024"އަކީ ރާއްޖޭގައި ހުރި އިންވެސްޓްމެންޓާއި ވިޔަފާރީގެ ފުރުޞަތުތައް ޗައިނާގެ ވިޔަފާރިިތަކާއި ހިއްސާކުރުމުގެ ގޮތުން ބޭއްވި ފޯރަމެކެވެ. މިފޯރަމްގައި އެކި ދާއިރާތަކުން ޗައިނާގެ މަޝްހޫރު ވިޔަފާރި ކުންފުނިތަކުން ބައިވެރިވިއިރު، މިފޯރަމް ބާއްވާފައިވަނީ ޗައިނާގެ ފޫޖިއާން ޕްރޮވިންސްގެ ވެރިކަންކުރާ ސިޓީ ފޫޒޯގައެވެ.