މިސަރުކާރުގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑު ވަޒީރު ނަރެންދުރަ މޯދީއަށާއި އިންޑިއާގެ ރައްޔިތުންނަށް ފުރައްސާރަކޮށް އެކްސްގައި ކުރި ޕޯސްޓްތަކާއި ގުޅިގެން ދިވެހި ސަރުކާރުން ރަސްމީ ސިފައެއްގައި މަޢާފަށް ނުއެދޭތީ، ފޮރިން މިނިސްޓަރ މޫސާ ޒަމީރު ރައްޔިތުންގެ މަޖިލީހަށް ޙާޟިރުކޮށް ސުވާލުކުރަން ހުށައަޅައިފިއެވެ.

ފޮރިން މިނިސްޓަރ މަޖިލީހަށް ހާޟިރުކުރެއްވުމަށް މަޖިލީހަށް ހުށައަޅުއްވާފައި ވަނީ، ގަލޮޅު ދެކުނު ދާއިރާގެ މެމްބަރު މީކާއީލް އަޙްމަދު ނަސީމެވެ.

މަޖިލީހަށް މީކާއީލް ހުށައަޅުއްވާފައިވާ ސުވާލަކީ، ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރަށް ސޯޝަލް މީޑިއާގައި ފުރައްސާރަކޮށް ކުޑައިމީސް ކުރުމުން ވެސް ސަރުކާރުގެ ފަރާތުން ރަސްމީ ސިފައެއްގައި މައާފަށް އެދިފައި ނުވަނީ ކީއްވެތޯ؟ އާއި އެކަމާ ގުޅިގެން އެ ޑެޕިއުޓީ މިނިސްޓަރުން މަގާމުން ވަކިނުކުރަނީ ކީއްވެތޯ؟ އެވެ.

އިންޑިއާގެ ބޮޑުވަޒީރާއި، އެޤައުމުގެ ރައްޔިތުންނަށް ފުރައްސާރަކުރުމުގެ ސަބަބުން ދެޤައުމުގެ ދެމެދުގައި އޮތް ގުޅުންތައް ގޯސްވެ އެކަމުގެ ސަބަބުން ރާއްޖޭގެ އިޤުތިޞާދަށް ގެއްލުންތައް ވަމުންދާކަންވެސް މީކާއީލް ނަސީމް ވަނީ ފާހަގަކުރައްވާފައެވެ.

ވަރަށް އާދައިގެ ވަޒީފާ ތަކެއްގައި ތިއްބެވި ތިންބޭފުޅަކަށް ރައީސް ޑރ. މުޙައްމަދު މުޢިއްޒުގެ ސަރުކާރުގައި ނައިބު ވަޒީރުކަމުގެ މަޤާމުތައް ދެއްވި އިރު، އެފަރާތްތަކުގެ ސްލޫކާއި އަޚުލާޤާއިމެދު ކުރިިންވެސް ސިޔާސީ ފަރާތްތަކުންނާއި ސަރުކާރާއި ދެކޮޅު ފަރާތްތަކުންވެސް ސުވާލު އުފެއްދިއެވެ. އަދި މިމައްސަލަ ދިމާވުމުންވެސް އެކަމުގައި ސަރުކާރުން ޢަމަލުކުރަމުން އަންނަ ފިނި ގޮތުގެ ސަބަބުން މަޝްރަޙް އިތުރަށް ގޯސްވަމުން އަންނަ ކަން ސިޔާސީ ފަރާތްތަކުން ވަނީ ފާހަގަކޮށްފައެވެ.

ފޮރިން މިނިސްޓަރ މޫސާ ޒަމީރާއި ސުވާލުކުރެއްވުމަށް ހުށައަޅުއްވާފައި ވާއިރު، ރައްޔިތުންގެ މަޖިލީސް މިވަގުތު އޮތީ ޗުއްޓީގައެވެ. އަދި ޓޫރިޒަމް މިނިސްޓަރ މޫސާ ޒަމީރުވެސް ހުންނެވީ، ރައީސުލްޖުމްހޫރިއްޔާ ޗައިނާއަށް ކުރައްވާ ފުރަމާނަ ދަތުރުފުޅުގައި އެމަނިކުފާނުގެ އަރިހުގައި ވަޑައިގެންނެވި ވަފުދާއިއެކު ޗައިނާގައެވެ.