ހުޅުމާލޭގެ މުނިސިޕަލް ކަންތައްތައް ސިޓީ ކައުންސިލްގެދަށަށް ބަދަލުވެގެން ދާއިރު، މުވައްޒަފުންގެ މުސާރަތައް އެއް އަހަރުފަހުން ކުޑަވާގޮތަށް ހަމަޖެއްސުމަކީ ބަލައިގަނެވޭނެ ކަމެއް ނޫންކަމުގައި މާލޭ ސިޓީގެ މޭޔަރުކަމުގެ މަޤާމަށް ވާދަކުރައްވާ އެމްޑީޕީގެ ކެންޑިޑޭޓް އާދަމް އާޒިމް ވިދާލުވެއްޖެއެވެ.

އާޒިމް މިހެން ވިދާޅުވީ، "ނޫން"ގެ ޚާދިމް ޕްރޮގްރާމްގައި ވާހަކަފުޅު ދައްކަވަމުންނެވެ.

އާޒިމް ވިދާޅުވީ، ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީކައުންސިލްގެ ދަށަށް މިހާރު ބަދަލުއެކުރެވެނީ، އާބަންކޯއިން ސިޓީކައުންސިލްގެ ދަށަށް ބަދަލުވާ މުވައްޒަފުންގެ ހައްޤުތަކެއް ގެއްލިގެންދާ ގޮތަކަށް ކަމަށެވެ. އެހެން އެކަމަކީ އޭނާއަށް އެއްބަސްވެވޭނެ ކަމެއް ނޫންކަމުގައި އާޒިމް ވިދާޅުވިއެވެ.

އާޒިމް ވިދާޅުވީ، ސަރުކާރުގެ ޕޮލިސީ ބަދަލުވެގެން ރައްޔިތަކަށް ނިކަމެތިކަމެއް ލިބުމަކީ ބަލައިގަނެވޭނެ ކަމެއް ނޫންކަމަށެވެ. އާޒިމް ވިދާޅުވީ، މިފެންނަނީ އާދައިގެ މުވައްޒަފުންތަކެއްގެ މުސާރަތައް ކުޑަވާނޭ ގޮތަށް އަމަލުކޮށްފައި، ސިޔާސީ މީހުންނަށް އެކަމުގެ ފައިދާ ކުރާ ގޮތަށް ކަމަށެވެ.

އާޒިމް ވިދާޅުވީ އެމުވައްޒަފުންގެ މުސާރަކުޑަކޮށް އެފައިސާ ނުކަނޑައިވެސް އެކަން ކުރެވޭނެ ގޮތްތައް ހުންނާނެ ކަމަށެވެ. މިގޮތުން އެ މުވައްޒަފުންގެ މުސާރަކުޑަކޮށްގެން ދައުލަތަށް އެފައިސާއިން ކުރެވޭނެ ކަމަކަށްވުރެ އެމުވައްޒަފުންނަށް އެމުސާރަ ލިބޭނެ ގޮތަކަށް ބޭއްވުންވެސް މާރަނގަޅުވާނެކަން އާޒިމް ވަނީ ފާހަގަކުރައްވާފައެވެ.

ހުޅުމާލެ މުނިސިޕަލް ޚިދުމަތްތައް މާލޭ ސިޓިކައުންސިލްގެ ދަށަށް ބަދަލުކުރާއިރު، އާބަންކޯގައި ތިބިި މުވައްޒަފުން ސިޓީކައުންސިލަށް ބަދަލުކޮށް އެމުވައްޒަފުންނަށް ލިބޭ މުސާރަ އެއް އަހަރުވާންދެން ދިނުމަށް ސަރުކާރުން ނިންމާފައިވާ ކަންވެސް އާޒިމް ވަނީ ފާހަގަކުރައްވާފައެވެ.

މިމައްސަލައިގައި އާބަންކޯގެ މުވައްޒަފުންގެ ކަންބޮޑުވުންތައް ހުރިކަންވެސް އެ މުވައްޒަފުންގެ ފަރާތުންވެސް ވަނީ ފާހަގަކޮށްފައެވެ. ހުޅުމާލެ މުނިސިޕަލް ޚިދުމަތްތައް ސިޓީ ކައުންސިލްގެ ދަށަށް ބަދަލުކުރުމުގެ މަސައްކަތް މިހިނގާ ޖެނުއަރީ މަހުގެ 31 ވަނަ ދުވަހާއި ހަމައަށް ނިންމުމަށް ސަރުކާރުން ވަނީ އަމާޒު ހިފާފައެވެ.