ޗައިނާ މޯލްޑިވްސް ފްރެޑްޝިޕް ބުރިޖް އެޅި ކުންފުނީގެ އިސްވެރިން ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަރިޙަށް އިޙްތިރާމްގެ ޒިޔާރަތެއް ކުރައްވައިފިއެވެ.

އެކުންފުނީގެ އިސްބޭފުޅުންނާއި ރައީސުލްޖުމްހޫރިއްޔާ ބައްދަލު ކުރައްވާފައި ވަނީ، މިހާރު އެމަނިކުފާނު ޗައިނާއަށް ކުރައްވަމުންގެންދަވާ ފުރަމާނަ ދަތުރުފުޅުގެ ތެރެއިން މިއަދު މެންދުރުއެވެ. މިބައްދަލު ކުރެއްވުން އޮތީ، މިއަދު މެންދުރު ކުރީގައެވެ.

ޗައިނާ މޯލްޑިވްސް ފްރެޑްޝިޕް ބުރިޖް ބިނާކުރުމުގެ އަމަލީ މަސައްކަތްތައް ކޮށްފައި ވަނީ، ޗައިނާ ކޮމިއުނިކޭޝަން ކޮންސްޓްރަކްޝަން ކޮމްޕެނީ ލިމިޓެޑް (ސީ.ސީ.ސީ.ސީ)އިންނެވެ.

ޗައިނާ މޯލްޑިވްސް ފްރެންޑްޝިޕް ބުރިޖު ބިނާކުރުމުގެ މަސައްކަތަކީ، އެހާތަނަށް ރާއްޖޭގައި ހިންގުނު ތަރައްޤީގެ އެންމެ ބޮޑު މަޝްރޫޢެވެ. ބުރިޖުގެ މަސައްކަތް ނިންމައި ހުޅުވީ، 2018 ވަނަ އަހަރުގެ އޮގަސްޓް މަހުގައެވެ. ބުރިޖުގެ މުޅި މަސައްކަތް ނިންމާލުމަށް 3 އަހަރާއި 11 މަސްދުވަސް ހޭދަވިއެވެ. ބުރިޖުގެ މަޝްރޫއަށް ގާތްގަނޑަކަށް 200 މިލިޔަނަށްވުރެ ގިނަ ޑޮލަރު ޚަރަދުކޮށްފައި ވެއެވެ.