އިންޑިއާގެ ބޮޑުވަޒީރު ނަރެންދުރަ މޯދީ، އިންޑިއާގެ ޓެރިޓަރީއެއްގެ ގޮތުގައި އޮތް ލަކްޝަދީބަށް ކުރެއްވި ރަސްމީ ދަތުރުފުޅުގައި، ލަކްޝަދީބުގެ ޓުއަރިޒަމް ޕްރޮމޯޓް ކުރެއްވުމަށް، ސޯޝަލްމީޑިއާއަށް ދޫކޮށްލި ޕޯސްޓްތަކާ ގުޅިގެން ދިވެހިން ފަތުރަމުންދާ ނަފުރަތާއި ތަފާތު ކުރުމަކީ ބަލައި ގަނެވޭނެކަމެއް ނޫންކަމަށް، އިންޑިއާގެ މަޝްހޫރު ފިލްމީ ތަރި އަކްޝޭ ކުމާރު ބުނެފިއެވެ.

ދެ ދިވެއްސަކު އިންޑިއާ އާއި އެ ގައުމުގެ ޕްރައިމް މިނިސްޓަރ ނަރެންދްރަ މޯދީއަށް ރަށްދުކޮށް "އެކްސް" ގައި ކޮށްފައިވާ ޕޯސްޓުތަކެއްގެ ސްކްރީން ޝޮޓާއެކު އަކްޝޭ ކުރި ޕޯސްޓުގައި އިތުރަށް ބުނެފައިވަނީ، މިފަދަ ނޭދެވޭ އަމަލުތަކެއް ހިންގަމުން މި ގެންދަނީ ދިވެހިރާއްޖެއަށް އެންމެ ގިނައިން ޓުއަރިސްޓުން ފޮނުވަމުން އަންނަ ގައުމާ ދެކޮޅަށް ކަމަށެވެ. އަދި އިންޑިއާއަކީ އަވަށްޓެރި ގައުމުތަކަށް އަބަދުވެސް އެހީ ފޯރުވާ، ގާތް ގުޅުމެއް ބާއްވަމުން އަންނަ ގައުމަކަށް ވީ ހިނދު، މިއީ ބަލައިގަނެވޭނެކަމެއް ނޫންކަން އަސަރާއެކު އޭނާވަނީ ފާހަގަކޮށްފައެވެ.

46 މިލިއަނަށް ވުރެން ގިނަ ފޮލޯވަރުން ތިބޭ، އަކްޝޭގެ ޕޯސްޓާއެކު ހިއްސާކޮށްފައިވާ ދިވެއްސެއްގެ އެއް ޕޯސްޓުގައި ވާގޮތުން، ޓުއަރިޒަމްގެ ދާއިރާއިން ރާއްޖެއާ ވާދަކުރެވޭނެކަމަށް ހީ ކުރުމަކީ ކުންހީއެކެވެ. އަދި ރާއްޖެއިން ދޭ ޚިދުމަތްތައް އެހެން ބަޔަކަށް ނުދެވޭނެ ކަމަށާއި، އެމީހުން (އިންޑިއާ މީހުން) އެހާ ތާހިރު ނުވާނެ ކަމަށާއި، އެތާގެ ކޮޓަރިތަކުން ދުވާ ނުބައި ވަހަކީ އެމީހުނަށް (އިންޑިއާ މީހުނަށް) އޮތް އެންމެ ބޮޑު ގޮންޖެހުމެވެ.

އަކްޝޭ ހިއްސާކޮށްފައިވާ ދިވެއްސެއްގެ އެއް ޕޯސްޓް

އަކްޝޭ ޕޯސްޓުގައި ދެން އޭނާ ފާހަގަ ކޮށްފައިވަނީ ދިވެއްސަކު "އެއީ މޯދީގެ ސަގާފަތް" ކަމުގައި ބުނެފައިވާ ތަންކޮޅެކެވެ. ދިވެއްސަކު މިހެން ބުނެފައިވަނީ އިންޑިއާ މީހުން އާންމު ތަންތަނަށް ބޮޑުކަމުދާ މަންޒަރެއް ހިއްސާ ކުރުމަށްފަހު، އޭނާ ބުނެފައިވާ ބުނުމެއްގެ ތެރޭގައެވެ.

އަކްޝޭ ހިއްސާކޮށްފައިވާ ދެވަނަ ޕޯސްޓު

މި ސަބަބުތަކާއި ހުރެ، ރާއްޖެއަށް އެތައް ފަހަރަކު ދަތުރުކޮށްފައިވާ އަކްޝޭ ބުނީ، އިހްތިރާމް ނުކުރުމަކީ ބަލައިގަނެވޭނެ ކަމެއް ނޫންކަމަށެވެ. އަދި އިންޑިއާގެ ރަށްތައް ތަޖުރިބާކޮށް، ގައުމުގެ ޓުއަރިޒަމް ފުޅާ ކުރުމަށް މަސައްކަތް ކުރުމަށް އިންޑިއާގެ ރައްޔިތުންނަށް އަކްޝޭ ވަނީ ގޮވާލާފައެވެ.

އިންޑިއާގެ އެހެން ފިލްމީ ފަންނާނުންވެސް ދަނީ އެ ގައުމުގެ ފަތުރުވެރިކަން މަޝްހޫރު ކުރުމަށް ވަނީ ކެމްޕެއިނެއް ފަށާފައެވެ.