ރައީސް އިބްރާޙިމް މުޙައްމަދު ޞާލިޙްގެ ސަރުކާރުގައި މޯލްޑިވްސް އިމިގްރޭޝަންގެ ކޮންޓްރޯލަރ ޖެނެރަލްގެ މަގާމު އަދާކުރެއްވި މުޙައްމަދު އަޙުމަދު ޙުސެއިން (ހަނަފީ) ވެސް، މިހާރުގެ ސަރުކާރުގެ އިސް އޮފިޝަލުންގެ ފަރާތުން ފެންނަމުންދާ ބޭ އަދަބީ އަމަލުތައް ހުއްޓުވުމަށް ގޮވާލައިފިއެވެ.

މިކަމަށް އަލިއަޅުވާލައި ހަނަފީ "އެކްސް" ގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ އިސް މަގާމުތަކުގައި ތިއްބަވައި، އަބަދުވެސް ރާއްޖެއަށް ގިނަ ގޮތްގޮތުން އެހީތެރިވެދެއްވަމުން އަންނަ އަވައްޓެރި އިންޑިއާގެ ސަރުކާރުގެ އެންމެ އިސް ބޭފުޅާ، އެ ގައުމުގެ ޕްރައިމް މިނިސްޓަރ ނަރެންދްރަ މޯދީއަށް ބޭ އިޙްތިރާމާއި ބޭއަދަބީ ބަސްތަކެއް ބޭނުން ކުރުމަކީ ދެ ގައުމުގެ ދޭތެރޭގައި އޮތް ތާރީހީ އެކުވެރިކަމަށް ބުރު އަރާނެކަމެއް ކަމަށެވެ. އަދި އޭނާވަނީ އެފަދަ އޮފިޝަލުންނަށް ފިޔަވަޅު އެޅުމަށް ސަރުކާރަށް ގޮވާލާފައެވެ. އެހެންނޫންނަމަ، ރާއްޖެ ފަދަ އެކްސްޕޯޓަށް ބިނާ ވެފައި އޮތް ގައުމަކަށް، މި ކަމުގެ ސަބަބުން ދަތި ކުރުންތައް ކުރިމަތިވާނެކަމަށް ބެލެވޭކަމަށް ވެސް އޭނާ ފާހަގަ ކުރެއްވެވިއެވެ.

މީގެ އިތުރުން، ކުރީގެ ދިއްގަރު ދާއިރާގެ މެމްބަރު، އަދި 2023 ވަނަ އަހަރުގެ ރިޔާސީ އިންތިހާބުގައި ވާދަކުރެއްވި ފާރިޝް މައުމޫން ވެސް ވަނީ މި މައްސަލައިގައި ހިމެނޭ އޮފިޝަލުންގެ އަމަލުތައް ސަރުކާރުން ކުށްވެރިކުރަން ޖެހޭނެކަމަށް ބުނެ "އެކްސް" ގައި ޕޯސްޓެއް ކޮށްފައެވެ. އަދި މިކަމަށް އެދެވޭ ފިޔަވަޅެއް ނާޅައިފިނަމަ، މިއީ ސަރުކާރުގެ ކޮމެންޓުތަކެއްކަމަށް ދެކުމުގެ ފުރުސަތު އޮންނާނެކަމަށް އޭނާ ފާހަގަ ކުރެއްވެވިއެވެ.

ސަރުކާރުގެ އިސް ބައެއް ބޭފުޅުންނާއި، ސަރުކާރަށް ތާއީދުކުރައްވާ ބައެއް ބޭފުޅުންގެ ފަރާތުން މިފަދަ ޕޯސްޓުތައް ޕޯސްޓްކުރަން ފެށީ އިންޑިއާގެ ބޮޑުވަޒީރު ނަރެންދުރަ މޯދީ، އިންޑިއާގެ ޓެރިޓަރީއެއްގެ ގޮތުގައި އޮތް ލަކްޝަދީބަށް ކުރެއްވި ރަސްމީ ދަތުރުފުޅުގައި، ލަކްޝަދީބުގެ ޓުއަރިޒަމް ޕްރޮމޯޓް ކުރެއްވުމަށް، ސޯޝަލްމީޑިއާއަށް ދޫކޮށްލި ޕޯސްޓްތަކާ ގުޅިގެންނެވެ. އަދި މި ރައްދުތަކާއި ގުޅިގެން ދެޤައުމުގެ ދެމެދުގައި ނުތަނަވަސްކަން ވެސް ވަނީ ބޮޑުވެފައެވެ.

މީގެ އިތުރުން މިކަމާ ގުޅިގެން ރާއްޖެއަށް ޗުއްޓީހޭދަކުރުމަށް އިންޑިއާގެ ރައްޔިތުން ނުދިޔުމަށް ގޮވާލައި އިންޑިއާގައި ސޯޝަލްމީޑިއާ ކެމްޕޭންތައް ވަރުގަދަ ކުރަމުންދާއިރު، ރާއްޖެއަށް ޗުއްޓީ ހޭދަކުރަން އައުމަށް ރާވާފައިވާ ބައެއް ފަރާތްތަކުން އެފަރާތްތަކުގެ ބުކިންތައް ކެންސަލްކޮށް ސޯޝަލް މީޑިއާގައި އެކަން ދަނީ ހާމަކުރަމުންނެވެ.