އެއްވެސް ސަބަބަކާހުރެ ރާއްޖޭގައި މަރުގެ އަދަބު ދޭން ފެށުމަކީ ފެންނަ ކަމެއް ނޫންކަމުގައި ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބުދުލްޤައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެކްސްގައި ލިޔުއްވި ޕޯސްޓެއްގައެވެ.

ރައީސް މައުމޫންގެ ޕޯސްޓުގައި ވިދާޅުވީ، އެއްވެސް ސަބަބަކާހުރެ ރާއްޖޭގައި މަރުގެ އަދަބު ދޭން ފެށުމަކީ ފެންނަ ކަމެއް ނޫންކަމަށާއި،  އަދި ޢާންމުންގެ ތާއީދު ހޯދުމަށް އެވާހަކަ ދެއްކުމަކީ ތަޢުލީމީ މީހަކު ކޮށްގެންވާނެ ކަމެއް ވެސް ނޫންކަމަށެވެ.

ސަރުކާރުން މަރުގެ ޙުކުމް ތަންފީޒު ކުރާނޭކަން ހާމަކުރުމާއި އެކު މީގެ ކުރިންވެސް ރައީސް މައުމޫނު ވަނީ އެކަމާިއ ދެކޮޅަށް ވާހަކަފުޅު ދައްކަވާފައެވެ. އަދި އެކަމާއި ގުޅިގެން ރައީސް މައުމޫނަށް ރާއްޖޭެގައި ތިއްބެވި ދީނީ ބައެއް އެހެން ޢިލްމުވެރިންގެ ފަރާތްޕުޅުން ފާޑުކިޔުންތައްވެސް އަމާޒުވެގެން ދިޔައެވެ.

ހުސްވި، ޑިސެމްބަރު މަހުގެ 20 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި، މިސަރުކާރުން މަރުގެ ހުކުމް ތަންފީޒް ކުރާނޭ ކަމުގައި ވިދާޅުވެ، ހޯމް ލޭންޑް މިނިސްޓަރު އަލީ އިހުސާން ވިދާޅުވީ، މިސަރުކާރުން މަރުގެ ހުކުމް ތަންފީޒް ކުރާނޭ ކަމަށާއި، އެކަމަށްޓަކައި ޤާނޫނާއި ޤަވާއިދުތަކުގެ އިމުގެ ތެރޭން ކުރަން ހުރިކަންކަން ކުރާނޭ ކަމަށެވެ. އެދުވަހު އެކަމާއި ގުޅޭ ގޮތުން ރައީސް މައުމޫނު ދެއްވީ ނުސީދާ ރައްދެއް ނަމަވެސް މިއަދު އެމަނިކުފާނު ވަނީ، ވަރަށް ސާފު ބަހުން މަރުގެ ހުކުމް ތަންފީޒުކުރުމާއި މެދު ދެކޮޅު ހައްދަވާފައެވެ. ރައީސް މައުމޫނުގެ 30 އަހަރުގެ ދިގުވެރިކަމުގައި ރާއްޖޭގައި މަރުގެ ޙުކުމްތައް އިއްވި ނަމަވެސް އެއްވެސް މީހެއްގެ މައްޗަށް މަރުގެ ޙުކުމް ތަންފީޒުކޮށްފައެއް ނުވެއެވެ.

ރާއްޖޭގައި އެންމެ ފަހުން މީހެއްގެ މައްޗަށް މަރުގެ ޙުކުމް އިއްވައި، ޙުކުމް ތަންފީޒްކޮށްފައި ވަނީ، 7 އޭޕްރީލް 1953 ގައެވެ. އެފަހަރު މަރުގެ ހުކުމް ތަންފީޒްކޮށްފައި ވަނީ ހުވަދު އަތޮޅު އަތޮޅުވެރިޔާ މަރާލުމުގެ ކުށުގައި ނިލަންދޫ ޙަކީމް ދީދީގެ މައްޗަށެވެ. އޭނާގެ މައްޗަށް މަރުގެހުކުމް ތަންފީޒްކުރީ ބަޑިޖަހައިގެންނެވެ.