ވެލާނާ އިންޓަނޭޝަނަލް އެއާޕޯޓުގައި އެއް ދުވަހެއްގެ ތެރޭ އެންމެ ގިނަ ސީޕްލޭން މޫމަންޓްސްއާއިއެކު އައު ރިކޯޑެއް ހަދައިފިއެވެ. މި ރެކޯޑް ހަދާފައިވަނީ މިދިޔަ އަންގާރަ ދުވަހުކަމަށް އެމްއޭސީއެލްއިން ވަނީ ބުނެފައެވެ.

އެމްއޭސީއެލް އިން ބުނީ، ރާއްޖޭގައި ސީޕްލޭން އޮޕަރޭޓްކުރާ ޓީއެމްއޭ، މޯލްޑިވިއަން އަދި މަންޓާ އެއާގެ 649 އެއާޓްރެފިކް މޫވްމަންޓްސް މިދިޔަ އަންގާރަ ދުވަހު ރެކޯޑުކުރެވިފައިވާ ކަމަށެވެ. މިއީ އެއް ދުވަހަކު، އެންމެ ގިނަ އަދަދަކަށް ސީޕްލޭން ދަތުރުތައް ރެކޯޑު ކުރެވުނު ދުވަސް ކަމަށް ވެސް އެ ކުންފުނިން ބުންޏެވެ. އެ ދުވަހު އެހެން މަތިންދާބޯޓުތަކާ އެކު 839 ފްލައިޓު މޫވްމަންޓު ވެލާނާ އެއާޕޯޓުގައި ވަނީ ރެކޯޑްކޮށްފައެވެ.

މީގެ ކުރިން އެއް ދުވަހުގެ ތެރޭގައި އެންމެ ގިނަ އަދަދަކަށް ސީޕްލޭން މޫވްމަންޓްސް ރެކޯޑުކުރެވިފައިވަނީ މިދިޔަ އަހަރުގެ ފެބްރުއަރީ މަހުގެ 19 ވަނަ ދުވަހުއެވެ. އެ ދުވަހު ވެލާނާ އެއާޕޯޓުގައި 629 ސީޕްލޭން ދަތުރު ރެކޯޑުކޮށްފައިވެއެވެ. އެހެންކަމުން އެއީ 20 މޫމަންޓްސްގެ އިތުރުވުމެކެވެ.

Advertisement

އެއް ދުވަހުގެ ތެރޭގައި ސީޕްލޭން ދަތުރުތަކުގެ އާ ރެކޯޑެއް ގާއިމުކޮށްފައި ވާއިރު މިއީ ފަތުރުވެރިކަމުގެ ޕީކް ސީޒަންއެވެ. ރާއްޖެ އަންނަ ފަތުރުވެރިންގެ އަދަދު ކޮންމެ އަހަރަކުވެސް މި ދުވަސްވަރު އިތުރުވެއެވެ.