އެކަކަށް ވުރެ ގިނަ މީހުން ބައިވެރިވެގެން ސިޔާސީ ޕާޓީތައް އުފެއްދޭ ގޮތަށް ސިޔާސީ ޕާޓީތަކުގެ ޤަވާއިދަށް ބަދަލު ގެނެސް ޢަމަލުކުރަން ފަށާފައިވާ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އިލެކްޝަންސް ކޮމިޝަންގެ މަސައްކަތްތަކާއި ގުޅޭ ގޮތުން މީޑިއާތަކަށް މަޢުލޫމާތު ދެއްވުަމަށް ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަންގެ ނައިބު ރައީސް، އިސްމާޢީލް ޙަބީބު ވިދާޅުވީ، ޤަވާއިދަށް ގެނައި އިސްލާޙް މިހާރު ދިވެހި ސަރުކާރުގެ ގެޒެޓްގައި ޝާއިއުކޮށްފައިވާ ކަމަށެވެ.

އަދި އަލަސް ގެނެވުނު ބަދަލާއި އެކު މިހާރު، އެކަކަށްވުރެ ގިނަ މީހުންނަށް އެއްޕާޓީއެއް ރަޖިސްޓްރީ ކުރުމަށް މަސައްކަތް ކުރުމުގެ ހުއްދަ ދޫކުރެވޭނެ ކަމުގައި ޙަބީބު ވިދާޅުވިއެވެ.

ކުރިން އޮންނަ ގޮތުން ސިޔާސީ ޕާޓީއެއް އުފައްދަން ބޭނުންނަމަ، އެކަން އިލެކްޝަންސް ކޮމިޝަނަށް ހުށައެޅޭނީ ކޮންމެވެސް އެކެއްގެ ނަމުގައެވެ. އަދި ކޮމިޝަނުން ޕާޓީ އުފެއްދުމުގެ ހުއްދަ ދޫކުރަނީވެސް އެފަރާތެއްގެ ނަންމަތީގައެވެ.

ސިޔާސީ ޕާޓީތައް އުފެއްދުމުގައި މިކަމުގެ ކަންބޮޑުވުން ކުރިންވެސް ބައެއް ފަރާތްތަކުން ފާހަގަކުރި ނަމަވެސް މިފަހަރު އެކަން ބޮޑަށް ފެންމަތި ކުރީ، ކުރީގެ ރައީސުލްޖުމްހޫރިއްޔާ ޢަބުދުﷲ ޔާމީން ޢަބުދުލްޤައްޔޫމުގެ ފަރާތްޕުޅުން ސިޔާސީ ޕާޓީއެއް އުފެއްދުމަށް މަސައްކަތް ކުރެއްވި ބޭފުޅުންނެވެ. ގިނަ ފަރާތްތަކެއް ބައިވެރިވެގެން ޕާޓީއެއް އުފެއްދުމުގެ ހުއްދައަށް އެދި ހުށައެޅޭ ގޮތަށް އޭރު ނޯންނާތީ، އެބޭފުޅުންވެސް ޕާޓީ އުފެއްދެވުމަށް ހުށައެޅުއްވީ، ރައީސް ޔާމީންގެ ދަރިކަލުން ޒެއިންގެ ނަންމަތީގައެވެ.