ފަތުރުވެރިކަމުގެ ދާއިރާއަށް ސޯޝަލް ހައުސިން ކެޓަގަރީއެއް ތަޢާރަފްކުރުމާއި ގުޅޭ ގޮތުން ވަޒީރުންގެ މަޖިލީހުގައި މިއަދު މަޝްވަރާކުރައްވާނެކަމަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ބާއްވާ ވަޒީރުންގެ މަޖިލީހުގެ ބައްދަލުވުމުގެ ކުރިން ރައީސް އޮފީހުގެ ޕްރެސްޓީމާއި ރައީސުލްޖުމްހޫރިއްޔާ ޙިއްޞާކުރެއްވި މަޢުލޫމާތުގައި އެމަނިކުފާނު ވިދާޅުވީ، ރާއްޖޭގައި ޑިވޮލޮޕްމަންޓް ބޭންކެއް އުފެއްދުމަށް ވަޒީރުންގެ މަޖިލީހުގައި މަޝްވަރާކުރެއްވުމުގެ އިތުރުން، ރާއްޖޭގައި އޮންލައިން ޕޭމެންޓް ޕްލެޓްފޯމްތައް ބޭނުންކޮށްގެން، ފައިސާ ދެއްކުމުގައި ހުރި ހުރަސްތައް ނައްތާލުމާއި ގުޅޭ ގޮތުންނާއި، ފަތުރުވެރިކަމުގެ ދާއިރާއަށް (މުވައްޒަފުންނާއި އާއިލާތަކަށް) ސޯޝަލް ހައުސިންގ ކެޓަގަރީއެއް ތަޢާރަފްކުރުންފަދަ މުހިއްމު ކަންކަމާއި ގުޅޭ ގޮތުން މިއަދުގެ ވަޒީރުންގެ މަޖިލީހުގައި މަޝްވަރާކުރައްވާނޭ ކަމަށެވެ.

މީގެއިތުރުން، ޚާއްސަކޮށް މީޑިއާ ވިލެޖް ޤާއިމްކުރުމުގެ ކަންތައްތަކާއި ގުޅޭ ގޮތުންވެސް މިއަދުގެ ވަޒީރުންގެ މަޖިލީހުގައި މަޝްވަރާކުރުމަށް އެޖެންޑާ ކުރެވިފައިވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ފަތުރުވެރިކަމުގެ ސިނާއަތުގައި މަސައްކަތް ކުރާ ފަރާތްތަކާއި އެފަރާތްތަކުގެ އާއިލާތަކަށް އެފަރާތްތަކުން ވަޒީފާ އަދާކުރާ ނުވަތަ ދިރިއުޅޭ ސަރަހައްދުތަކުގައި ހިންގާ ސޯޝަލް ހައުސިންގެ ސްކީމްތަކަށް ކުރިމަތި ލެއްވޭނެ ގޮތް ހަދައި ދިނުމަކީ، ރައީސުލްޖުމްހޫރިއްޔާގެ ރިޔާސީ ވަޢުދު ތަކުގެ ތެރޭގައި ހިމެނޭ ކަމެކެވެ.

ރައީސުލްޖުމްހޫރިއްޔާ ކަމުގެ މަޤާމަށް، ޑރ. މުހައްމަދު މުޢިއްޒު ވަޑައިގެންނެވުމަށްފަހުގައި އެމަނިކުފާނު ގެންދަވަނީ، ހަފްތާއަކު ދެފަހަރު ވަޒީރުންގެ މަޖިލީހުގެ ބައްދަލުވުންތައް ބާއްވަމުންނެވެ. މިގޮތުން މިފާއިތުވި 54 ދުވަހުގެ ތެރޭގައި ބޭއްވުނު ވަޒީރުންގެ މަޖިލީހުގެ ބައްދަލުވުންތަކުގައި ވަރަށް ގިނަ މުހިއްމު ބޮޑެތި ނިންމުންތަކެއް މިހާތަނަށްވެސް ވަނީ ނިންމަވާފައެވެ.