ރައްޔިތުންގެ މަޖިލީހުގެ އިންތިޚާބު ބާއްވާ ތާރީޚު މިއަދު އިއުލާންކުރުމަށް ކުރިން ނިންމި ނަމަވެސް އެކަން މިހާރު ފަސްކޮށްފައި ވާކަމަށާއި، މިހަފްތާ ތެރޭގައި މަޖިލީހުގެ އިންތިޚާބު ބޭއްވޭނޭ ތާރީޚެއް އިއުލާނު ކުރެވޭނެ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބު މިކަން އިއުލާނު ކުރެއްވީ ކޮމިޝަނުން މިއަދު ބޭއްވި

ނޫސްވެރިންގެ ބައްދަލުވުމުގައެވެ.

ޙަބީބު ވިދާޅުވީ ކުރިން މިއަދު ތާރީޚް އިއުލާނުކުރަން މަސައްކަތް ކުރި ނަމަވެސް އެކަން ފަސްކުރީ ކޮމިޝަންގެ ބައްދަލުވުމުގައި މިއަދު މަޝްވަރާކުރެއްވުމަށްފަހުގައި އިތުރަށް ސިޔާސީ ޕާޓީތަކާއެކު އެކަމާއި ގުޅޭ ގޮތުން މަޝްވަރާކުރެއްވުމަށް ކަމަށެވެ.

މަޖިލިސް އިންތިޚާބު ރޯދަމަހުގެ ތެރޭގައި ނުބޭއްވުމަށް އެދި އެންމެ ބޮޑުޕާޓީ އެމްޑީޕީން ވަނީ އިލެކްޝަންސް ކޮމިޝަނަށް ސިޓީއެއް ފޮނުވާފައެވެ. އެކަމާއި ގުޅޭ ގޮތުން ޙަބީބު ވިދާޅުވީ އެމްޑީޕީއާއެކު މާދަމާ 11:30ގައި ބައްދަލުވުމެއް ބޭއްވުމަށް ކޮމިޝަނުން ނިންމަވާފައިވާ ކަމަށެވެ. އަދި ވީހާވެސް އަވަހަކަށް މަޖިލީހުގެ އިންތިޚާބު ބާއްވާ ތާރީޚު އިއުލާނު ކުރެއްވޭތޯ މަސައްކަތް ކުރައްވަމުން ގެންދަވާ ކަމަށާއި އަދި މަޖިލިސް އިންތިޚާބާއި ގުޅޭ އެހެން ކަންކަންވެސް މިހާރު ކުރެވެމުންދާކަމުގައި ކޮމިޝަނުގެ ނައިބު ރައީސް އިސްމާޢީލް ޙަބީބު ވިދާޅުވިއެވެ.

މިއަހަރުގެ ރޯދަމަސް ފެށޭނީ، މާރިޗު 11 ގައެވެ. އަދި ރޯދަމަސް 9 އޭޕްރީލްގައި ނިމޭއިރު ހަރޯދަ ނިމޭނީ، އޭޕްރީލް މަހުގެ 16 ވަނަ ދުވަހުގައެވެ. ރޯދައިގެ ފަހަށް އިންތިޚާބު ލަސްކޮށްފިނަމަ، ޤާނޫނުގައި ބުނެފައިވާ މުއްދަތަށް އިންތިޚާބުގެ ކަންކަން ނިންމާނުލެވުމުގެ ފުރުޞަތު އޮންނާނެ ކަމުގައިވެސް އިލެކްޝަންސް ކޮމިޝަނުން ކުރިންވެސް ވަނީ ބުނެފައެވެ