ރައީސުލްޖުމްހޫރިއްޔާގެ އޮފީހުގެ ރަސްމީ ވެބްސައިޓް ހިމެނޭ ގޮތަށް ސަރުކާރުގެ މުހިއްމު އިދާރާތަކުގެ ވެބްސައިޓްތައް ޑައުންވެއްޖެއެވެ.

މިގޮތުން ރައީސުލްޖުމްހޫރިއްޔާގެ އޮފީހުގެ ވެބްސައިޓާއި، މިނިސްޓްރީ އޮފް ޓުއަރިޒަމްގެ ވެބްސައިޓާއި މިނިސްޓްރީ އޮފް ފޮރިން އެފެއާޒްގެ ވެބްސައިޓް ވަނީ ޑައުންވެފައެވެ.

ނޫން.ޑޮޓްއެމްވީއަށް މައުލޫމާތު ލިބިފައިވާ ގޮތުަގައި، ސަރުކާރުގެ މުހިއްމު އިދާރާތަކުގެ މައިވެބްސައިޓްތައް ޑައުންކޮށްލާފައި ވަނީ ސައިބާ ހަމަލާތަކެއް ދީގެންނެވެ. އެހެން ނަމަވެސް އެކަން ސަރުކާރުން ކަށަވަރުކޮށެއް ނުދެއެވެ. އަދި ރާއްޖޭގެ ސަރުކާރުގެ އިދާރާތަކަށް އަމާޒުކޮށް ސައިބަރ ހަމަލާއެއް ދިންކަމުގެ ޒިންމާ އެއްވެސް ބަޔަކު އުފުލާފައެއް ނުވެއެވެ.

ރައީސުލްޖުމްހޫރިއްޔާގެ އޮފީހުގެ ރަސްމީ އެކްސް އެކައުންޓުންކޮށްފައިވާ ޕޯސްޓުގައި ބުނެފައިވަނީ ދިމާވި މައްސަލަ ހައްލުކުރުމަށް އެންސީއައިސީޓީއާ ގުޅިގެން މަސައްކަތް ކުރަމުންދާ ކަމަށެވެ.

ރާއްޖޭގެ ސަރުކާރުގެ މައި އިދާރާތަކުގެ ވެބްސައިޓްތައް ޑައުންވެފައި މިވަނީ، އިންޑިއާގ ބޮޑުވަޒީރު ނަރެންދުރަ މޯދީ ލަކްޝަދީބަށް ކުރެއްވި ރަސްމީ ދަތުރުފުޅުގައި، ލަކްޝަދީބުގައި ޓުއަރިޒަމް ޕްރޮމޯތް ކުރެއްވުމާއި ގުޅޭ ޕޯސްޓްތަކެއް ކުރައްވާފައި ވަނިކޮށް އެއަށް، މިސަރުކާރުގެ ޑެޕިއުޓީ މިނިސްޓަރުންގެ ލެވެލްގައި ތިބި ބައެއް ފަރާތްތަކުން، ވަރަށް ބޭއަދަބީ ގޮތެއްގައި ފާޑުކިޔައި ފުރައްސާރަކޮށްފައި ވަނިކޮށް، ދެޤައުމުގެ ރައްޔިތުންނާއި، ސިޔާސީ އެކްޓިވިސްޓުންގެ މެދުގައި އެކްސްގައި ބަހުގެ ހަމަލާތައް ބަދަލުކުރަމުންދާ ދަނޑިވަޅެއްގައެވެ.